Air Greenland: Angallassinikkut aningaasaqarnikkullu ilungersunartorsiorpugut
Naqqiut: KNR-ip saqqummersitsereernerata kingorna Air Greenland attaveqarpoq, paasissutissanik kukkusunik saqqummiussisoqarsimammat. KNR-ip allaaserisaani allaqqagaluarpoq ukioq manna qaammatit tallimat qaangiunneranni, taannali qaammatit pingasut affarlu qaangiunneranninngortillugu naqqinneqarpoq. Aningaasattaaq atukkat ingerlatsinermut atorneqartut allaaserisami allaqqaqqaaraluarpoq, aningaasalli pisinissanut atorneqassasut, Air Greenlandip KNR-imut erseqqissaatigaa. Taamaammat taanna allaaserisamit peerneqarpoq. Kukkuneq KNR-ip ajusaarutigaa, aaqqillugulu.
Timmisartorsuaq Tuukkaq Nuummut missinnaanngikkaangat imaluunniit sinerissami silamik peqqutilimmik timmisartuussisoqarsinnaanngikkaangat, angalasut najugaqartinneqarnerat nerisaqartinneqarnerallu Air Greenlandimut akisusarpoq.
Tamannali allatut aaqqiivigineqarsinnaanera eqqartorneqartariaqarsorineqalersoq, Inga Dora G. Markussen isumaqarpoq.
- Aningaasat taakku matussuserneqassappata soorunami ataasiinnaq akiliisussanngorpoq tassa angalasut, Air Greenlandimi piujuartitsinermut attaveqatiginnermullu pisortaq oqarpoq nangillunilu:
- Kisianni maannamut taanna iiginnartariaqarparput akiligassaq annertugaluartoq. Kisianni isummerfigineqartariaqassaaq sualummik aamma eqqarsaatigissallugu unammillerneqalernerput taakku taamatut pisussaaffeqarpat?
Pisussaaffik uani pineqartoq tassaavoq, timmisartortitseqatigiiffiit allat nunatsinnut takornariarlutik tikittut apuuteriarlugit nunatsinniit aallaqqittussaapput, taakkulu takornariarlutik tikittut silarlummik nalaataqarpata ingerlariaqqissinnaajunarlutik, tassaavorlu Air Greenland najugaqartitsinissamut nerisaqartitsinissamullu aningaasartuuteqalertussaq.
Aningaasartuuterpassuit
Air Greenlandimut ilaallutik angalasut silarlummik eqqugaasut immaqaluunniit qulimiguullit timmisartullu atortuinik ajutoorneratigut kinguaattoornernik aallanngitsoornernilu aningaasartuutaangaatsiarput.
- Piffissaq kingullertigut immaqa maluginiarneqartarpoq aamma Tuukkap utertariaqartarnera allallu, mittarfiup quasappallaarneri taakku ilangullugit kisianni piffissami aamma uani maluginiaqquneqarpoq aamma qutsissutsimi sila unerisimanngittarnera ilaasarmata.
Imarpissuaq qulaallugu timmisartuussinerit ukiut 45-t Kangerlussuakkut ingerlanneqarput, siorna novemberi naalersoq Nuuk mittarfissuartaarpoq. Aningaasartuuteqarnerit tassunga attuumaasuteqarnersut aperaarput:
- Taama oqarsinnaanngilagut peqqutigalugu eqqugaasut amerlanerpaat sineriamminngaaneeramik kangiani kujataani aningaasartuuteqartorujussuulluta tassani takusinnaavarput.
- Kisianni aamma eqqaamaneqassaaq silap pissusia Kangerlussuarmi sineriammilu assigiinneq ajormata, taamaattumik sila allaanera maani isugutannera issisiut qerinnaraangat anori apeqqutaalluni, soorunami allatut pissuseqarpoq aamma mittarfiup tungaatigut taamaattumik sila allaavoq Kangerlussuarmi maani sineriammilu illoqarfiit eqqarsaatigalugit, Inga Dora G. Markussen oqarpoq.
