Angallannerup siunissaa suli inissinngilaq

- Politikkikkut isumaqatigiinnissaq eqqarsaatigalugu Inatsisartuni ippassaq oqallinneq isumalluarnarpoq. Assartuussinermut Isumalioqatigiisitap innersuussinermini inassutigaat, misissugassat misissorluarneqarnissaat naammassineqarlutillu, tamannalu Inuit Ataqatigiit aamma oqaatigaat, tassalu politikkikkut isumaqatigiittoqartoq uanga isumaqarpunga. Tassalu misissugassat maanna aallartinnissaat piareersarsinnaanngorparput, Ineqarnermut, Attaveqarnermut Angallannermullu Naalakkersuisoq, Jens B. Frederiksen taama oqarpoq.

Narsarsuup timmisartoqarfia matullugu Qaqortumi mittarfiliornissaq qaqugu aallartinneqassanersoq Jens B. Frederiksenip massakkorpiaq akisinnaannginnerarpaa.

- Misissuinerit naammasseqqarlugit tamanna oqallisigineqassaaq. Tamatuma kingorna aatsaat allannguinissanut sulinerput aallartissaaq, Jens B. Frederiksen oqarpoq.

- Anguniarparput inuiaqatigiit aningaasaqassusaat piffissaq ungasissoq isigalugu aaqqiissuteqarnissaq, taamaalilluta inuiaqatigiinnut pitsaaneq toqqarniassagatsigu, Jens B. Frederiksen oqarpoq.

Narsarsuarmi innuttaasut Naalakkersuisunit ataatsimeeqatigineqareernerisa kingorna, Narsarsuup mittarfiata siunissaami aaqqiissutigineqarnissaa pillugu innuttaasut isummersuutaat maanna Jens B. Frederiksenip nerrivianiipput.

- Suliassat taakku maanna maani misissorneqarput. Taakkulu marloqiusanut avinneqarlutik suliarineqarput, tassalu teknikkikkut atortoriassaarutinut apeqquteqaatit illuatungaanilu inuit ataasiakkaat atugaasa misissorneqarnerat suliarineqaleruttorluni. Mittarfillu atorunnaarsinneqassappat ilaqutariit inuillu ataasiakkaat eqqarsaatigalugit qanoq iliuuseqarnissarput naatsorsuutigineqarsinnaavoq, Ineqarnermut, Attaveqarnermut Angallannermullu Naalakkersuisoq, Jens B. Frederiksen taamaa oqarpoq.