Angalaqatigiittartut sulinerat iluatsilluartoq

februaarip 08-at 2015 15:28

Inersimasut meeraanerminniillu kinguaassiutitigut atornerlugaasimanermik kingunerisaanik atugarliuuteqarnerminni Angalaqatigiittartunit katsorsarneqartalernerat atorluarneqarpoq.

Naalakkersuisut nittartagaanni taama allaaserisaqartoqarpoq.

 
Angalaqatigiit sulinertik 2013-imi septembarimili aallartimmassuk innuttaasut 245-t saaffiginnissuteqarsimapput. Inersimasut 182-it meeraanerminni pisimasut kingunerluttoorutigisimasatik pillugit maannamut katsorsarneqarsimanngikkunik Angalaqatigiit tarnip pissusaannut katsorsaasuinit suliniuteqarfigilereersut nalunaarutigineqarpoq.
 
Nunatsinni inersimasut amerlasuut meeraanerminniilli kinguaassiutitigut atornerlugaasarsimapput, tamatumali kingunerisaanik inuttut assigiinngitsutigut tarnimikkut kingunerlutsitsillutik.
 
Angalaqatigiit Naalakkersuisunit 2013-imi apriilimi pilersinneqarput. Tarnip pissusaannik ilisimasaqartuupput namminersortut, katsorsaasarnermikkullu ikiorsiiniartussaallutik, pineqartullu tamatuma kingorna inoqatimik, ilaquttamik suliffeqarnerullu tungaatigut pitsaanerusumik ingerlaaseqarsinnaalernissaa aqqutissiuusseqataaniarfigissallugu.
 
Angalaqatigiit Qaqortumi maanna sulileruttorput, sineriatsinni angalangaatsiareerput, Uummannaq, Aasiaat, Paamiut Maniitsorlu suliniuteqarfigineqarnikuullutik.