Múte B. Egede Danmarkilialersoq: Angajoqqaat piginnaasaannik misiliisarnerit ministerilu oqallisigissagaat

Aaqqiissuteqarniarneq sivisuallaangaatsiarpoq. Ataatsimiinnermilu isumaqatigiittoqanngippat naalakkersuisut siulittaasuat Mette Frederiksenimut ingerlatitseqqinniarpoq.

Allattoq Andreas Wille, Kim Hinrichsen

decembarip 06-at 2024 16:45

Meeqqanut Ilaqutariinnullu Naalakkersuisoq, Aqqaluaq B. Egede (IA), danskit isumaginninnermut ministeriannik, angajoqqaat piginnaasaannik misissuutit oqallisaaqisut pillugit ataasinngornermi naapitseqqilerpoq.

Aamma atuaruk Naalakkersuisoq angajoqqaanut misissuutit pillugit: Neriorsuuteqarnikuunngilanga

Naalakkersuisut siulittaasuat, Múte Bourup Egede, ataatsimiinnermi tusarnaartuussaaq, piumasartillu naammassineqanngippat ministeriunermukassaaq.

- Akuersaarneqarsinnaanngilluinnarpoq danskit kommuniisa ilaasa taamatut atuinerat. Pissutigalugu, Naalakkersuisut maannakkut ukiut marlunngulersut matuma siornali taakkuninnga unititsisoqarnissaanik saaffiginnissuteqarnikuummata, Naalakkersuisut siulittaasuat, Múte Bourup Egede, Danmarkimi angajoqqaat piginnaasaannik misissuutit, kalaallinut aamma atorneqartarnerat pillugu KNR-imut taama oqarpoq.

Isumaqatigiinngitsoqartoq

Isumaginninnermut ministerip aamma meeqqanut inuusuttunullu naalakkersuisup naapinnerat isumaqatigiinngiffiungaatsiarpoq. Kina qanorpiaq oqarpa?

Kalaallit angajoqqaat piginnaasaannik misiliinerit isornartorsiungaatsiarneqartut atorunnaaqqullugit danskit ministeriat kommuninut allagaqarniarluni neriorsuisimanerarlugu, Aqqaluaq B. Egede oqarpoq.

Aamma atuarukDanskit isumaginninnermut ministeriat angajoqqaanut misissuut oqallisaangaatsiartoq pillugu kommuninut allakkamik nassiussisoq

Isumaginninnermulli ministeri misiliisarnernik unitsitsinissamik isumaliuteqarnissamik kommuninut kaammattuuteqaannarniaarluni oqarsimanerarpoq.

Ataatsimiinnermit imaqarniliaq meeqqanut inuusuttunullu naalakkersuisoqarfimmit allanneqarsimasoq, KNR-ip allagaatinik takunnikkumanermini pissarsiaraa.

Imaqarniliamilu atuarneqarsinnaavoq Sophie Hæstorp Andersen oqaqqaarsimasoq ”borgmesterinut allagaqarniarluni, misiliisarnerit (angajoqqaat piginnaasaannik misiliisarnerit, aaqq.) ilumut atorneqartarnissaannik isumaliuteqaqqusilluni.”

Angajoqqaat piginnaasaanik misissuutit suuppat?

Misissuutit tamarmik malittarisassat malillugit suliarineqartarput. Angajoqqaat piginnaasaannik misissuinerup imarisaa allanngorarsinnaavoq, misissoriaaserli imaakkajuppoq:

Angajoqqaat aamma sulianik isumaginnittup kiisalu tarnip pissusianik ilisimasallip angajoqqaat piginnaasaannik misissuisussap akornanni aallartisarnermi ataatsimiinneq. Suliassap imarisaa isumaqatigiissuteqartarpoq, misissuinerup ingerlanissaata imaa oqaluuserineqartarpoq, angajoqqaaq taamaalilluni ingerlatsinissamut sapinngisamik piareersimasarluni. Piffissat, sumiiffissat sivisussusissaalu aalajangerneqartarput.

Suliami allagaatit naleqquttut misissorneqartarput. Tamanna tarnip pissusianik ilisimasalimmit suliarineqartarpoq.

Angajoqqaat tunuliaqutaat inuunerallu ilaatigut pillugit misissuilluni apersuinerit.

Angajoqqaat misissorneqarnerat. Misissuinerup ilusaa suliassap suunera apeqqutaasarpoq. Tamanna nalinginnaasumik inuttut qanoq ittuuneranik msissuinermut aamma eqqarsartaatsikkut qanoq inneranik kiisalu attaveqariaatsimik attaveqarnermullu piginnaasanik misissuinermut tunngagajuppoq.
Suliassap qanoq innera apeqqutaalluni meeraq tarnip pissusianik ilisimasalimmik aamma misissorneqartarpoq. Tamanna misissuinissaq sioqqullugu isumaqatigiissutigineqartarpoq.

Sunniivigeqatigiinnernik nakkutilliineq. Ilaqutariit sunniivigineqatigiinnerannik aamma suliamut pineqartumut atatillugu nakkutilliinerit aaqqissuunneqarnerat.

Utertitsiviginninnermi ataatsimiinneq siullermik angajoqqaat peqatigalugit kingornalu angajoqqaat suliamillu isumaginnittoq peqatigalugit nalunaarusiaq misissuinerullu inerneri misissorneqartarput.

Paasissutissarsiffik: www.forældrekompetenceundersøgelse.dk

Allisiguk

Kingornali ima allaqqasoqarpoq:

”Kommunit tarnip pissusianik ilisimasalimmik nalilersueqataasinnaasutut akuerisamik peqataatitsilluni angajoqqaat piginnaasaannik misiliisarnernik kalaallit angajoqqaat meeraannik arsaarinneratarnissamik suliani atuiunnaassasut ilanngullugu allakkumaarini, isumaginninnermut ministeri neriorsuivoq.”

Tassa imaappoq meeqqanut inuusuttunullu naalakkersuisoqarfiup ataatsimiinnermit imaqarniliaani qularutissaanngitsumik allaqqavoq, Sophie Hæstorp Andersen Aqqaluaq B. Egedemut neriorsuisimasoq maanna periuserineqartumik unititsiumaarluni.

Aamma atuaruk Immikkut ilisimasalik: Angajoqqaanik naliliisarneq ajornartorsiutit ilaminiinnaraat

Tamanna Danmarkimi isumaginninnermut ministerip KNR-imut siornatigut oqaatigeriigaata akerlerluinnaraa.

Taamaammat imaqarniliami allaqqasut ministerip isumaqataaffiginerai aperiniarlugu KNR Danmarkimi isumaginninnermut ministereqarfimmut saaffiginnippoq. Taannali apersorneqarusunngilaq.

Múte Mettelu naapissagunartut

Pisoq tamaat – aamma isumaginninnermut ministerip akissutaa, Múte Bourup Egedep naammagilluinnarpaa.

- Naammaginanngilluinnartutut isigaara. Pissutigalugu taama sivisutigisumik ilisimaneqareermat danskit naalakkersuisuininngaanniit misissueriaatsit taamattut kalaallinut atorneqasinnaanngitsut, Múte B. Egede taama oqarpoq.

Múte Bourup Egede, Aqqaluaq B. Egedep isumaginninnermut ministeri, Sophie Hæstorp Andersen, Danmarkimi ataasinngornermi ataatsimeeqatigilerpagu aallaqqaammut tusarnaartutut peqataassaaq.

- Ataatsimiinnermi peqataassaanga takutinniarlugu Kalaallit Nunaanni naalakkersuisut suliaq una sakkortuumik malinnaavigalugulu piumasaqarfigigaat. Nerrivimmi tassani piumasaqaataasussaq tassaavoq anitinnata aaqqiissutissamik neriorsuillutillu iliuuseqassasut.

Aamma atuarukIsorineqaraluaqisut: Nalileeriaasitaassat piareernissaannut suli ukiut arlaqarsinnaasut

Ataatsimiinnermi angajoqqaat piginnaasaannut misissuutit kalaallinut atorunnaarsinneqarniarneri iliuuseqarfiginiarneqanngippat naalakkersuisut siulittaasuat ministeriunermut, Mette Frederiksenimut piaartumik saaffiginnissuteqalersaarpoq.

- Pimoorussivugut. Iliuuseqartoqartariaqarpoq. Sulinerput sivitsorpoq. Tusaanngitsuusaarneqarnerpullu naammaginngilluinnarparput, naalakkersuisut siulittaasuat, Múte Bourup Egede oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.