VIDEO Angajoqqaat oqallinnermi pissuserissaarnerunissaq kissaatigigaat

Meeqqat ernuttallu akornanni sakkortuumik oqallittoqartartoq, Qaqortumi innuttaasut ilisarisinnaalluarpaat.

- Nakkarsaanerit tusaasaqaagut. Inuusuttunik atuartitsisarpunga, taakkua akornanni ersarittorujussuusarpoq. Taamaammat nakkarsaanerit ulluinnarsiutigivallaarpagut, Jakob Motzfeldt oqarpoq.

Aammattaaq urani pillugu akerliussutsimik takutitsinermi kingullermi nakkarsaaneq takusimavaa, taamaammat sooq inuit assigiingitsumik isumaqarsinnaasarnerisa meeqqanut nassuiaatigineqartarnissaa ujartorpaa.

- Akerliussutsimik takutitsinerit qiviaannaraanni sorujussuanngortitsisoqartarpoq. Meeqqat eqqarsaatigivallaarnagit nilliasarpugut. Tassani meeqqanut nassuiaalluarnissaq pisariaqarpoq.

Oqaatsinik iioraasarput 

Oqaatsit ulluinnarni atorneqartartut meeqqat iiorartaraat, Gerda Tellesenip erseqqissaatigaa.

- Nipaalluunniit ilaanni sakkortusaramik, oqaatsit ilaanni sakkortusarlutik. Taava meeqqat tigusillaqqittaqigamik oqaatsinik. Ernutara taamaattarpoq, tigusillaqqeqaaq oqaatsinik. Taava ilaarsisarput ernuttakka marluk, Gerda Tellesen oqarpoq.

Politikerit maannakkornit, oqallittarnerni nakkarsaanermik malersuinermilluunniit atugaqarfiusumit, takutitsilluarnerusariaqartut, Aviâja Egede Lynge isumaqarpoq. Oqallinnermi oqaatsit atorneqartut inoqatinut ataqqinninnginermik ersitsitsisinaasartut isumaqarluni.

Taamaammat nunatsinni oqallinneq kusarnarnerusoq meeqqat illersuisuata ujartorpaa.

- Isumaqatigiinngikkaluarluta qanoq pissuserinnerusumik ataqqinninnerusumillu oqallissinnaavugut meeqqanut ajortumik nakkarsaanerunngitsumillu, taamatullu sunniuteqanngitsumik, Meeqqat illersuisuat oqarpoq. 

Aamma atuaruk  Meeqqat illersuisuat: Oqalliseriaaseq meeqqanut inuusuttunullu aamma sunniuteqarpoq

Taamaammat meeqqat atuarfianni tamat oqartussaaqataanerannik sammisaqarneq skemamut ikkunneqassasoq, meeqqat illersuisuata kissaatigaa.

- Taava assigiinngitsutigut sungiusartarpaat taanna isumaqatigiingikkaluarluni tunngavilersukkamik oqaloqatigiisinnaaneq ataqqinninneq aallaavigalugu, Aviâja Egede Lynge nassuiaavoq.

Qaqortumi angajoqqaat naapitagut aamma isumaqataapput.

- Tassa eqqissillutik oqaluuttarunik kamaannertaqanngitsumik assortuunnertaqanngitsumik meeqqanut tassa aatsaat peqqinnartoq, Gerda Tellesen oqarpoq.