Angajoqqaat meeqqanut akilersuutinut milliartit koruunit affangajaannik akiitsoqartut - uanga illillu akilertarpavut

Angajoqqaat 4.000-t sinnerlugit, taakkunannga ataataasut amerlanerit meeqqanut akilersuutit akilerneq ajorpaat. Ataataasulli ima pissakitsigaat allaat akiliisinnaassuseqaratik, aningaasaqarnermut naalakkersuisoq oqarpoq.

Allattoq Kim Hinrichsen

juulip 19-at 2023 08:01

Nutserisoq Sussi Jensen

438.633.148 koruunit.

Meeqqanut akilersuutit angajoqqaanit Namminersorlutik Oqartussanut suli akilerneqanngitsut maanna taama amerlatigipput.

Angajoqqaajusummi aappaa akiliigaluarpat akiliinngikkaluarpalluunniit meeqqanut akilersuutit kisimiilluni pilersumut tunniunneqartarput, taamaasillunilu Namminersorlutik Oqartussat karsianni amigaatigineqartut arriitsumik amerliartorput aningaasammi oqartussanit matussuserneqartussaapput.

Aamma atuarukBørnepenge og børnebidrag skal hæves

Amigartoorutit, aningaasat tunniunneqanngikkaangata, uanga illillu akilertaleriaqartarpavut.

Tamanna ilungersunarlunilu pissusissamisuunngiitsoq, aningaasaqarnermut naligiissitaanermullu naalakkersuisoq, Naaja Nathanielsen, oqarpoq.

- Ingerlaavartumimmi kisitsisit pissarsiarisarpakka, tusarlugillu nikallornartaqaaq. Inuit akiliisinnaassuseqanngitsut paasisinnaasarpakka, akiliisinnaassuseqartulli akiliinissamut piumassuseqanngitsut pakatsissutigalugillu kamassutigisarpakka. Tamanna innuttaasunut, annermik meeqqanut, inuiaqatigiinni annaasaqartitsisarpoq. Tamanna pissusissamisoorsorinngilara.

Angutit akisussaaffimmik misigisimanermik amigaateqarput

Inuit 4.079-it pingaartumik angutit, Namminersorlutik Oqartussanut aningaasarpassuarnik akiitsoqarput. Agguaqatigiissillugu inuk ataaseq 93.148 koruuninik akiitsoqarpoq. Taakkunannga 901-t arnaapput 3.808-llu angutaallutik.

Akiligassallit taama amerlatigisut angutaanerat ataatatut akisussaaffeqartutut misigisimanerannik misigisimannginneranilluunniit inuiaqatigiinni annertunerusumik oqallisigineqartariaqartoq, angutitullu meerartaartitsinnginnermi eqqarsarluaqqaartariaqartut, Naaja Nathanielsen isumaqarpoq.

- Atoqateqartaraanni kingunerisinnaasai - tassalu meeqqat - akisussaassusilimmik tiguneqarsinnaasariaqarput. Meerartaarnissaq akissaqarfigineqartariaqarpoq, inersimasuunermut tamanna ilaavoq, taanna oqarpoq nangillunilu:

- Suut tamarmik akeqarnerat eqqaamaneqartariaqarnera pingaaruteqartoq isumaqarpunga. Meeraqarneq assoroornarlunilu piffissamik atuiffiuvoq, kisianni aamma aningaasanik naleqarpoq. Meerartaarnissaq akissaqarfigineqartariaqarpoq, inersimasuunermut tamanna ilaavoq, taama isumaqarpunga.

Aamma atuarukAningaasanut inatsisissaq sukannerfiusorujussuussaaq – meeqqalli inuusuttullu qitiutinneqassapput

Akileraartarnermut Aqutsisoqarfimmili pisortaq Kim Neumann Nielsen naapertorlugu angutit amerlasuut isertitaqannginnerat ajornartorsiutit annerpaartaaraat. Taamaammat akileraarutitigut akiliisitsiniartarnikkut akiitsut akilerneqarsinnaaneq ajorput.

Meeqqanut akilersuutit

Aallaavittut angajoqqaat meeqqaminnut 18-iliinissaata tungaanut pilersuinissaminnut pisussaaffeqarput. Angajoqqaat najugaqatigiinngippata pilersuinerlu isumaqatigiissutigisinnaanngikkunikku kommuni ilanngussinnaavaat. Angajoqqaap akilersuisussaatitaasup pilersuisutut akilersuutit akilersinnaanngippagit tamanna aamma atuuppoq.

Meeqqanut akilersuutit annertussusaanni angajoqqaat isertitaat apeqqutaasarput, amerlanerpaartaanulli qaammammut akilersuutit nalinginnaasut 1023 koruuniupput.

Januaarip 1-ni 2023 innuttaasut akiligassaannut suliat 86.979-iupput taakkunani:

Angutit 3808-t agguaqatigiissillugu 99.655 koruuninik akiitsoqarput

Arnat 907-it agguaqatigiissillugu 65.648 koruuninik akiitsoqarput

Najoqqutaq: norden.org, Naalagaaffiup Sinniisoqarfia aamma Akileraartarnermut Aqutsisoqarfik

Allisiguk

Taamaammallu akiitsut arriitsumik amerliartuaarusaartarput, aningaasallu pissarsiarinissaanut aqutsisoqarfik periarfissaqarneq ajorpoq.

Inuiaqatigiit sanngiitsut tapersersussavaat

Piumassuseqartoqarpalli aaqqiinissamut aamma aqqutissiuussisoqartariaqarpoq. Angajoqqaammi akisussaaffimminnik tigusinissaannut aqqutissiuuneqartariaqartut Naaja Nathanielsen isumaqarpoq.

- Sulianik nutaanik takkuttoqartuaannarnera soqutiginarpoq. Tamannalu aaqqittariaqarpoq, assiliarmi tamakkiisoq isiginiartariaqarparput. Paasisariaqarparput akiitsut akilerneqarneq ajormata aamma nalikillilerneqarneq ajormata, taanna oqarpoq.

Akileraartarnikkut aaqqissuusseqqinerit, piitsuussutsimik killiliinerit akiligassalinnillu siunnersuinerit iluaqusiullugit angajoqqaarpassuarnik imminnik meeqqaminnilluunniit pilersuisinnaangitsunik ajornartorsiuteqarneq aaqqinniarlugu iliuuseqalersaarluni Naaja Nathanielsen pilersaaruteqarpoq.

Aamma atuarukSiumukkormiut aningaasanut inatsisissamut pingaarnertut kissaataat pingasuusut

Pisortaqarfiilli angajoqqaat akisussaafiinik tigusinissaat naatsorsuutigineqassappat tamanna pissusissamisuunngitsoq, taassuma erseqqissarpaa. Ataatsimoornermi inuit ataasiakkaat akisussaaffeqarnerat pillugu eqqartuisariaqarpugut. Angajoqqaatut innuttaasutullu.

- Amerlanerpaartaatta paasisinnaavaat inuit ilaat nalorninartorsiuleriataarsinnaasartut ikiorneqarnissaminnillu pisariaqartisartut. Inuilli aningaasaatillit akiligassaminnik piaaralutik akiliineq ajornerat inuit naapertuilluarnermut sianiginninnerannik innarliisartoq isumaqarpunga, tamannami tamatsinnut tuttarpoq, Naaja Nathanielsen oqarpoq nangillunilu:

- Innuttaasutut akisussaaffeqarneq pillugu tunngaviuusumik eqqartuisoqartariaqarpoq. Inuiaqatigiinni suut tamarmik ingerlassappata aningaasanik naleqassaaq. Pisinnaasag piginnaasallu malullugit ikioqaritiigiissaagut. Tamanna ilinniarnikkut, sulinikkut inuiaqatigiillu aningaasaqarnerannut tapiinikkut piviusunngortinneqassaaq.