Ane Lone Bagger: Pituffik pillugu isumaqatigiissut USA-mik suleqateqarnitsinnut pingaaruteqarpoq

Pituffimmi sullissinissamik isumaqatigiissut Danmarkimi suliffeqarfimmit annaaneqarluni amerikamiut suliffeqarfiannut 2014-imi tunniunneqarmat Kalaallit Nunaata USA-llu akornanni pissutsit pitsaavallaarunnaarput, nunattalu karsia aamma eqqorneqarpoq.

Suliariumannittussarsiuussinissamut nutaamut isumaqatiginninniarnerit kingorna taava unittooqqapput. Naalakkersuisut amerikamiut politikerii atorfilittaalu tamanna pillugu arlalerialutik ataatsimeeqatigereeraluarluaraat taama pisoqarpoq.

- Naalakkersuisut Danmarkimi naalakkersuisut peqatigalugit, sulissutigisimavaat amerikamiut sakkutooqarfiata Kalaallit Nunaanniinnera sapinngisamik annerpaamik iluaqutiginiassallugu. Tassani ingammik kiffartuussinissamut isumaqatigiissut qitiuvoq, tamannalu USA-mut arlaleriarluta taakkartortarsimavarput, aamma amerikamiut politikerit atorfilittallu toqqaannartumik ataatsimeeqatigisarnerisa nalaanni.

Nunanut allanut tunngasunut naalakkersuisoq, Ane Lone Bagger Naalakkersuisut nittartagaani taama allapoq.

Suliarli Kalaallit Nunaata USA-llu siunissami attaveqaqatigiinniarnerannut pingaaruteqarpoq.

AAMMA ATUARUK USA-p kunngeqarfiullu Pituffimmi kiffartuussinissamik isumaqatigiissut oqallisigigaat

- USA-p suleqatigineqarnissaanut atatillugu Pituffimmik sulliissinissamik isumaqatigiissut pingaarnertut inissinneqartariaqarpoq, Ane Lone Bagger allappoq.

Suleqatigiinnissamik isumaqatigiissut Pituffimmut soorunami attuumassuteqartariaqartoq nunattalu aningaasarsiorneranut malunnaatilimmik ataavartumillu sunniuteqartariaqartoq, Naalakkersuisut piumasaraat.

Kalaallit Nunaatali USA-mut suleqateqarluarnera Ane Lone Baggerip Altingetimi oqallissaarummi erseqqissaatigaa, USA-mi nunap immikkoortui Maine Alaskalu taakkununnga ilaallutik.

USA-p 82 millionit koruuninik nunatsinni aningaasaliissuteqarsinnaanissaa naalakkersuisut apriilimi akuersissutigaat, aningaasat pingaartumik takornariartitsinermut aatsitassarsiornermilu atorneqassallutik.