Ane Hansen: Kapisillit tunisassiarneqarnissaat eqqarsaatigisariaqarparput
Nunat pineqartut tassaapput Norge, Skotland, Irland, Island Canadalu, nunani taakkunani kapisillit niuernikkut ilunaarniutigalugit aalisarneqartarput. Kalaallit Nunaanni kapisilinniartarnerup niuernikkut iluanaarniutigineqartarnera 2002-mi unitsinneqarpoq.
Nunat pineqartut sukannernerusumik malittarisassaqarnissartik pisariaqartinnerlugu eqqarsaatigissagaat, Ane Hansenip ilaatigut oqaatigaa.
- Kissaatiginarpoq pisariaqarlunilu peqataasut tamarmik kingunissalimmik suleqatigiinnermut peqataanissaat, taamaalilluta siunissami piujuartitsinissamik tunngaveqarluni kapisilinniarneq aallarteqqissinnaaniassagatsigu, Ane Hansen oqarpoq.
Kalaallit Nunaanni aalisartut ukiuni kingullerni pingasuni-sisamani kapisillit amerligaluttuinnartut aalisartarlugit nalunaaruteqartartut, Ane Hansen oqalugiarnermini ilaatigut oqaatigaa.
- Paasisat tamakku tupinnanngitsumik kinguneraat aalisartortavut iluanaarniutigalugu kapisilinniarnerup ammarneqaqqinnissaanik maannakkut piumasaqaateqartalermata. Kapisillit aalisartunit pisarineqarlutik nalunaarutigineqartartut ukiuni tulliuttuni amerligaluttuinnassappata, kapisillit Kalaallit Nunaanni niuernikkut iluanaarutaallutik tunisassiarineqarnissaasa ammarneqarnissaa eqqarsaatigisariaqarparput, Ane Hansen oqarpoq, taakkua nungusaataanngitsumik aalisarneqassasut erseqqissaatigalugu.
Kapisillit pillugit ilisimatuussutsikkut misissuinermi, ukiuni pingasuni kingullermi ingerlanneqartumi, Kalaallit Nunaat peqataavoq. Misissuineq USA-mit, Canadamit EU-millu tapiiffigineqarpoq.
- Ilisimatuussutsikkut misissuinerit ingerlaannarnissaat neriuutigaarput, aamma neriuutigaarput misissuinerit misilittaanerillu KNAPK-mit tapersersorneqarumaartut, Kapisillit Piujuartinnissaat pillugu Suleqatigiiffiup NASCO-p Ilulissani ukiumoortumik ataatsimiinnerani, aalisanermut naalakkersuisoq Ane Hansen oqarpoq.
