Andreas Mogensenimut suleqataanullu paarlattaasussat Floridamit avataarsualiartut

Avataarsualiartitsisartut SpaceX-ikkut avataarsualiartaataat amerikamiut avataarsualiartartut pingasut, avataarsualiartartorlu Ruslandimeersoq USA-mi naalagaaffimmit Floridamit sapaammi unnukkut avataarsualiartinneqarput.

Taakku nunat tamalaat avataarsuani misissuisoqarfianut ISS-imukarput, nunarsuaq qaammatini arfinilinni kaaviiaartussaallugu.

Avataarsualiartartoq Danmarkimeersoq Andreas Mogensen suleqataalu taakku taarsissavaat. Andreas Mogensen ilanilu ISS-imiillutik nunarsuaq siorna aggustimili kaaviiaalerpaat.

Andreas Mogensen qallunaat akornanni siullersaalluni avataarsualiartaatip avataanukarluni ilaatigut sulisussaagaluarpoq, avataarsualiartaatimili assigiinngitsutigut aniasoortoqarnera pissutaalluni avataani sulinissaq arlaleriarluni kinguartinneqartarpoq, Andreas Mogensenillu avatarsualiartaatip avataani sulinissani maanna angumerinngitsoortussanngorpaa.

Naallu taamaakkaluartoq nunarsuaq kaaviiaarlugu avataarsuani sulineq misigisassaasoq tupinnaannartoq Andreas Mogensenip februaarip qiteqqunnerani oqaatigaa.