Andreas Mogensen qaammatini arfinilinni avataarsuaneereerluni nunarsuarmut utertoq

Avataarsualiartartoq Danmarkimeersoq, Andreas Mogensen, nunat tamalaat avataarsuani misissuisarfianni qaammatini arfinilinni sulereerluni nunarsuarmut utersimalerpoq.

Amerikamiut avataarsualiartitsisarfiata NASA-p toqqaannartumik aallakaatitaani tamanna takuneqarsinnaavoq.

Andreas Mogensen suleqatini pingasut peqatigalugit USA-mi naalagaaffiup Floridap sineriaata avataani immamut mippoq.

Avataarsualiartaatip immamut minnera NASA-p aallakaatitsisup uppernarsarpaa, oqarluni "Dragon splashdown".

Avataarsualiartaatip nunarsuarmut utertup aqqa "Crew Dragon Endurance" matumani pivaa.

Oqaaseq "splashdown" immamut minnermut tunngassuteqarpoq.

Avataarsualiartaatip nunarsuarmut uternera iluatsilluartoq, NASA-p oqaatigaa. Avataarsualiartaammi nunarsuarmut utermat miffiata nalaani silagippoq, malliorpallaarnanilu.

Nunat tamalaat avataarsuani misissuisarfiata ISS-ip immikkoortua tassannga kaanngarluni nunarsuarmut ataasinngornermi uteriartuaalerpoq.

Andreas Mogensen ilanilu pingasut akunnerit 18-it missaanni ingerlaareerlutik nunarsuarmut uterput.

Avataarsualiartaatip ilaa immamut meqqammiinnartoq umiarsuarmit aaneqarput, avataarsualiartaatillu ilaa umiarsuarmut qaqinneqarluni.

Qallunaaq avataarsualiartartoq, Andreas Moegnsen, nunat tamalaat avataarsuani misissuisarfiannut aappassaa sulivoq.