Anders Fogh Rasmussen misissuisitsinialerpoq
Ministeriunerup, Anders Fogh Rasmussenip, Folketingip nunanut allanut ataatsimiititaliaa ullumi ataatsimeeqatigereerlugu, illuatungiliuttut piumasaat akueralugu neriorsuutigaa, danskit sakkutuui, Afghanistanimi 2002-mi tigusanut amerikamiut sakkutuuisa tammaarsimaffianni naalliutsitsinermut pisooqataanersut, misissuiffigineqassasoq.
Tusatsiakkat filmimi DR-ip piviusulersaarutaani oqaatigineqarput, illersornissamullu ministeri, Søren Gade, eqqunngitsunik Folketingimut aamma tassani paasissutissiisimanerarneqarpoq.
Illersornissamut ministeri, Søren Gade, ullumikkut kamannissaminut pissutissaqarluarpoq.
Filmimi, DR-ip piviusulersaarutaani, sapaatip-akunnera ataaseq sinnilaarlugu qaangiuppat takutinneqartussami, oqaatigineqarpoq, Søren Gade Folketingimut eqqunngitsumik paasissutissiisimasoq.
Matumani pineqarpoq 2002 aallartilaartoq danskit sakkutuuisa iliuuseqarnermikkut afghanistanimiut 30-t missaanniittut tigusarisimagaat, amerikamiullu sakkutuuinut tunniussimallugit, taakkunanngalu ullut arlallit tigummineqarsimasut. Ilaatigut oqaatigineqarpoq tigusat unatarneqartarsimasut.
Matumani apeqqutaalerpoq tigusarineqartut sorsunnermi tigusaanersut, tassa Søren Gade naapertorlugu, sorsunnermi tigusaanngillat, tigummigallarneqaannarput kikkuuneri paasiniarneqarniassammata, tamatumalu kingorna iperarneqarlutik.
- Sorsunnermut atatillugu tigusaqanngilagut, Afghanistanimi tigusavut tigummigallarneqaannarput, aamma danskit sakkutuuisa tigusaat tamarmik inuppalaartumik pineqartarput, Søren Gade oqarpoq.
Piviusulersaarummik filmiliortut sinnerlugit Christoffer Guldbrandsen oqarpoq, tigusat sorsunnermi tigusaanerat qularutissaanngitsoq.
Matumani danskit sakkutuuisa nalunaarusiaat aallaavigineqarput. Nalunaarusiami oqaatigineqarpoq, afghanistanimiut tigummigallarneqarsimasut talebaninut ilaasutut pasillugit, tassa Genevemi isumaqatigiissut naapertorlugu sorsunnermi akeqqatut isigisariaqarput, taamalu sorsunnermi tigusatut isigisariaqarlutik, Christoffer Guldbrandsen oqarpoq.
