Liss anaanani eqqaaniarlugu kalaallisuuliortoq

Kalaallisuut allanit allaanerulluarput, oqaluttuassartarpullu.

- Anaanaga marluinnarnik ukioqartunga takoqqusaajunnaagarput ataqqiniarlugu kalaallisuuliorpunga, ilusilersuisartoq namminersortorlu Liss Stender taama oqarpoq.

Liss Stender uinilu Peter Jensen juunimi apersortitsissapput. Ullormilu pingaartumi Liss kalaallisoorusuppoq.

Kalaallisuussanilu sanaleramigit anaanami assinganik kalallisoortumik qalipaatilimmik pissarserusussimagaluarpoq, iluatitsinanili.

- Asseq ullualuit isigaara, anaanagalu assimiittoq aperaara: Qanoq qalipaateqarpit? Paasilerparali kalaallisuuliassakka qernertoq qaqortorlu kisiisa atorlugit sanassallunga, Liss Stender.

AAMMA ATUARUK Kalaallisuunik nutarterisarneq soqutiginarnerulersitsisuuvoq

Anaanartik isertorlutik pulaartarpaat

Liss Stenderip qatanngutaalu tallimat Qasigiannguani meerallutillutik ataataata danskiusup arnaat Rebekka Brandt takoqqujunnaarpaa.

Naak ukiut marluk nunaqqatigiikkaluarlutik attaveqatigeeqqusaasimanngillat, sunali peqqutaanersoq paasisimanngisaaannarlugu.

Arfinilinnillu ukioqartoq ataatartik ilagalugu Danmarkimut nuupput.

- Danmarkimut nuukkatta anaanaga aamma nuuppoq, isertorlutalu pulaartarparput. Ilisarisimalivinngilarali.

Kalaallisut oqaatsikka puigorpakka kinaassuseralu katallugu misigisimallunga, Liss Stender oqarpoq.

AAMMA ATUARUK Akerliusut: Kalaallisuut mutilianut atornerlunneqarput

Kulturikkut nutaaliorneq

Kalaallisuulli immikkuullarissut aamma kalaallit kulturiannik isiginnittaatsimik allannguerusunnermik oqariartuuteqarput.

Kulturerput nutaanngulaarlugu oqaluttuareqqinneqarsinnaasoq Liss Stender isumaqarpoq.

Kalaallisuunillu allanalaartunik sananera inuppassuit alutoraat.

- Amerlasuut sapiitsuliornerarpaannga. Uangali sapiitsuliornermut tunngasuteqanngitsoq isumaqarpunga.

Anaanaga ataqqiniarpara eqqaamaneqartuaannarnissaalu siunertaralugu, Liss Stender oqarpoq.

Anaanamik maqaasinerup nassataanik qulliit kuuttuarsimapput, taamaattumillu nuilarmiuni qulliit kuuttut aamma ilanngunneqarlutik.

Kalaallisuullu qaammatini qulingiluani ulapputigereerlugit maanna oqilisimaarpoq.

- Iluunngarlunga nuannaarpunga. Anaanaga maaniippoq, Liss Stender attortisimalluni taama oqarpoq.

Liss Stenderip kalaallisuuliai Nuummi illoqarfiup qeqqani pisiniarfiani inuk Designimi alakkarneqarsinnaapput.