Akerliusut: Kalaallisuut mutilianut atornerlunneqarput
Mutit atuagassiami Vogue-mi saqqummiunneqaqqammersut sanariarlugit ukiaru tuniarneqalersussat akerliusut unitsinniarpaat, Peter Jensenilu akiligassinneqassasoq oqarlutik. Akerliussutsimik takutitsinermik aaqqissueqataasoq, Aili Liimakka Laue isumaqarluinnarpoq nunat inoqqaatut pisinnaatitaaffigut kalaallisuunik ilaarsinikkut innarlerneqartoq, taamaammallu Peter Jensenip sanaartortitai unitsittariaqartut.
Nuutoqqami amminik mersortarfimmit Kittat-niit eqqartuussiviup tungaanut ingerlaaqatigiinneq inunnit 40-t missaanniittunit peqataaffigineqarpoq. Namminersornerullutik Oqartussat silataannut apuunnermi Kultureqarnermut Naalakkersuisoq Tommy Marø, Piniarnermut Naalakkersuisoq Finn Karlsen aamma Naalakkersuisut siulittaasuat Hans Enoksen anillapput. Tamarmik Europami pileraluttuartoq akerleraat.
- Kalaallit inuiattut assuutaat taamatut ikkatigineqarnerarat akuersaarsinnaanngilluinnaqqissaarpara. Kulturerput aamma ataqqineqartariaqarpoq.
Kisianni pisoq tamanit akerlerineqanngilaq. Ilinniartoq Mette Mortensen isumaqarpoq, kalaallisuut pillugit nunatsinni inuusuttunik eqqarsalersitsineq ajunngequteqartoq.
- Inuusunnerusugut imaallaat eqeersimaarnerulissaagut. Uagut kinguaariit kingulliit kalaallisuut soqutigivallaanngilagut. Taamaammat periarfissat nutaat isumassarsiorfigisinnaavagut.
Qularnanngitsoq ataasiuvoq, tassalu kalaallisuut ullumikkut piusut kalaallisuunillu ilaarsilluni mutiliat oqaluuserineqarnerat tamaanga killeqarnavianngilaq.
