Ammasuunissamik aaqqissuussineq Inatsisartuni nutaani atorluarneqarpoq

Radioaviisip Inatsisartunut ilaasortanngortut 31-t sianerfigalugit apersorsimavai, taakkunanngalu 26-erujussuit nammineq atorfigisatik aningaasatigullu attuumassuteqarfigisatik pillugit paasissutissanik nassiussissamaarput - ilarpassuilumi nassiussereersimallutik. Marluk akipput immaqa taamaaliorumaarlutik, Inatsisartunulli ilaasortanngortut pingasut apersuinermut akissuteqarsimanngillat.

 Inatsisatut siuliini ilaasortat qulingiluaannaat nammineq kajumissutsimik aaqqiissuussinermut atuipput - taakkunanngalu amerlanersaat IA-meersuullutik. Politikerilli qinikkat nammineq aningaasaqarnermikkut soqutigisaat attuumassuteqarfigisaallu pillugit innuttaasut siunissami periarfissaqarnerunissaat ilimanarpoq.

- Siuariarneruvoq angisooq nuannaarutigaara. Tamanna naalakkersuisooqatigiilersut ammasuunissamik pingaartitsisuunerinut takussutissaavoq, Atassutip siulittaasua, Gerhardt Petersen oqarpoq.

Apersuinermi akissuteqarsimanngitsut ilagaat, Siumup ukiuni arlalinni siuttorisimasaa Naalakkersuisunullu siulittaasuusimasoq, Hans Enoksen. Aammattaaq parteeqatai Evelyn Frederiksen Karl-Kristian Kruselu akissuteqarsimanngillat.

Tamanna Siumumeersup qaqortormiup Kaj Lyberth uggornartoqartippaa.

- Nammineq kajumissutsimik aaqqissuussinermut peqataaniarnerluni nammineq aalajangigassaavoq, amerlanerusulli peqataassamaarlutik nalunaaruteqarsimanerat pitsaasuuvoq, Kaj Lyberh, Siumumeersorpassuit, pissaanerup nikinnerata kingorna, nammineq aningaasaqarnerminnut paasissutissanik Inatsisartut nittartagaatigut saqqummiussiniartut ilaat, oqarpoq.

Gerhardt Jakobsenip Siumukkormiut peqataaniarlutik nalunaarsimanngitsut naalakkersuisooqatiginni ulluinnarni suleqatigiinneq aqqutigalugu kaammattorniarpai.

- Atorfigisaminnik aningaasatigullu soqutigisaqarfigisaminnut paasissutinik saqqummiussinissaannut kaammattuunnassavakka, Atassutip siulittaasua oqarpoq.

Politikerit pappilissanik immersuinissaminnut maajip tallimaanut killilerneqarsimapput.