RIO 2016 Ammaanersiornissaq sioqqullugu: Danmark Irakilu isikkamik arsaallutik unammissapput

Olympiadep innera tikiunneqarmat Riomi illoqarfiup immikkoortuani avannarlermi uivernersuaqarpoq. Akerliussutsimik takutitsisut hunnorujut arlallit innermik tigumiartoq assersorpaat, akerliussutsimilluni takutitsisut qimagutsinniarlugit politiit gassi qulliliornartoq serpalittaatillu qasilitsortallit atorpaat, nutaarsiassaqartitsivik AP taama allaaserisaqarpoq.

OL-imut atatillugu Riop aningaasartuutigisai akerleralugit taama takutitsisoqarpoq. Riomi pisortani atorfillit akissarsiassaat kinguartinneqarsimapput tamannalu pissutigalugu OL-imik aaqqissuussineq inuit ilaannit kamaatigineqarluni.

Olympiadep innerata Brasiliami qaammatini pingasuni angallanneqarnera arlaleriarlugu akornusersorniarneqartarsimavoq.

Unammiuaarnerit pisortatigoortumik ammaanersiorneqarnerat aqagu unnukkut nalunaaqutaq arfineq-marlunut KNR2-kkut aallakaatinneqassaaq - ammaanertavia nalunaaqutaq qulingiluanut pissalluni.

OL-ili sioqqutsilluni ullumikkumit aallakaatitsilissaaq, danskit OL-eqarnerani nunanut allanut unammisartui siullerpaamik unammissallutik, unammisassaalluni tassaapput Irakimiut. Tamannalu KNR2-kkut nalunaaqutaaq 13.50 pissaaq.

Danmarkip unamminerata kingorna aamma Brasiliap Sydafrikallu unamminerat nalunaaqutaq tallimanut aamma Portugalip Argentinallu unamminerat nalunaaqutaq arfineq-marlunut aallakaatinneqassapput.