CPH:DOX-imi ammaanersiornissaq taamaatiinnarneqartoq
Inuit pissangallutik assuarlutillu nunarput pillugu filmimik piviusuleraarusiamik 'Kampen om Grønland'-imik filmertarfimmut isiginnaariarnissaraluat qatangiinnarpoq.
Filmit piviusulersaarutit pillugit festivalimi CPH:DOX-imi ammaanersiornissaq coronavirusip tuniluutilertornissaata aarleqqutigineqarnera pissutaalluni taamaatiinnarneqarpoq, Kalaallit Nunaallu pillugu filmi piviusulersaarusiaq tassani takutinneqartussaagaluarpoq. Festivalimik aaqqissuisut tusagassiuutinut taama nalunaaruteqarput
AAMMA ATUARUK Nunatsinnut isiginnittariaaseq ilitsersuisup allanngortikkusukkaa
Det Kongelige Teaterimi marsip ulluisa 17-ianni ammaanersiortoqartussaagaluarpoq, piviusulersaarut "Kampen om Grønland" ammaanersiornermi inunnit katillugit 1200-nit peqataaffigineqartussaagaluartumi takutinneqartussaagaluarluni.
Festivalimilli aaqqissuisut aalajangerput, Danmarkimi oqartussaasut coronavirusip tuniluutilertornissaa aarleqqutigineqarnera pissutaalluni aaqqissuussanik inunnit 1000-nit ikinnerunngitsunit peqataaffigineqartussanik taamaatitsinissamut inassutaat maleruassallugu. Inassutaat marsip naanerata tungaanut atuukkallarpoq.
Piviusulersaarut takutinneqaqattaassasoq
Piviusulersaarusiarli Katuami marsip ulluisa 13-ianni takuteqqaarneqassaaq.
AAMMA ATUARUK Filmi piviusulersaarut: Inuusuttut piginnaasallit Københavnimi filmfestivalimik ammaasuussasut
"Kampen om Grønland"-ilu Københavnimi marsip ulluisa 17-ianni ammaanersiornermi takutinneqartussaanngikkaluartoq festivalip ingerlanneqarnerani arlaleriarluni takutinneqassaaq.
Marsip ulluisa 18-ianni takutinneqassaaq, takutinneqareerpallu oqallitsitsisoqassaaq, peqataassappullu Folketingimi ilaasortat Aki-Matilda Høegh-Dam (S) aamma Søren Espersen (DF), oqallisaarisartoq Juno Berthelsen filmimilu peqataasut Inatsisartuni ilaasortaq Tillie Martinussen (Suleqatigiissitsisut) isummanillu siaruarteriniaq Paninnguaq Heilmann.
