Jerimiassen: Amigartooruteqartoqarnera pillugu ernumasoqartariaqanngilaq
Avannaata Kommuniata borgmesteria Palle Jerimiassen tusagassiuutinut nalunaaruteqarluni allappoq:
- Siullermik erseqqissaatigerusuppara, Qaasuitsup Kommunerisimasaata 2017-imut naatsorsuutai suli naammassinngimmata, aatsaallu tamanna juunimi pisussatut naatsorsuutigineqarluni. Nalunngisarpulli unaavoq, kommuniusimasup amigartoorutissai naatsorsuutigisamiit annertunerujussuupput, borgmesteri allappoq.
Qaasuitsup Kommuniata karsimiittuutitai 111 millionit koruunit kommunip akiligassanut akiliutigisimagai, taamaammallu kommunit nutaat marluk, Avannaata Kommunia Kommune Qeqertalillu, aningaasanik avitassaminnik kingornussaqarnaviarunanngitsut sapaatit akunnerata siuliani saqqummerpoq.
Naatsorsuutit qulaajaaffigineqassasut
Akerlianik kommunit nutaat akiligassanik Qaasuitsup Kommunianeersunik akiliisariaqarsinnaassapput.
Kommune Qeqertallip borgmesteria, Ane Hansen, Qaasuitsup Kommunianut 2017-imut naatsorsuutit qulaajaaffigineqaqqaassammata politikkikkut suliarineqarnerata kinguartinneqarneranut atatillugu taama oqaluttuarpoq.
AAMMA ATUARUK Kommunit nutaat millionerpassuassaat tammartut
Karsimiittuutit tammarnerat Avannaata Kommunianut, Qaasuitsup Kommunianit kingornussassaagaluartut ilanngullugit 6 millionit koruuninik amigartooruteqartussatut 2018-imut missingersuusiortumut, ajornartorsiutaasinnaavoq.
Ingerlatsinermut isumalluartoq
Avannaata Kommuniata borgmesteria, Palle Jerimiassen, Qaasuitsup Kommuniata naatsorsuutaasa akuerineqannginnerini annerusumik oqaaseqarusunngilaq.
Ernumasoqartariaqanngitsorli allappoq.
- Avannaata Kommunianit erseqqissaatigissuarput, innuttarisavut toqqissisimannginnissaminnut tunngavissaqanngitsut. Avannaata Kommuniani ukioq manna ingerlatsinerput isumalluarfigaarput, Palle Jerimiassen allappoq.
KNR Qaasuitsup Kommuniani borgmesteriusimasumut, Ole Dorphimut, attaveqarpoq. Kommunili atorunnaarnikuummat, oqaaseqarumanngilaq.
