Amigartoornerujussuit naammalernerarpaat
Ingerlatseqatigiiffiit aningaasarsiornikkut ukiuni kingullerni aningaasarlioreersullu taama aalajangertoqartoq, tusagassiuutinut nalunaarummi atuarneqarsinnaavoq.
Najoqqutassiat ingerlatseqatigiiffinni ataasiakkaani siulersuinermi ammanerunermik pilersitsinissaat neriuutigineqarpoq, inuiaqatigiinni tusatsiakkat naapertorlugit oqallittarnerup taamaalilluni annikillisarneqarnissaa anguniagagaalluni.
Ingerlatseqatigiiffiit najoqqutassianik kaammattuutigisanik suliaqarneranni tamakkiisumik takussutissiaq suliffeqarfiit namminneq nittartagaanni ingerlatseqatigiiffiit ukiumut ataasiarlutik tamanut saqqummiuttarniarpaat.
- Naalakkersuisut naalakkersuisooqatigiinnermik isumaqatigiissumminni neriorsuutiginikuuaat anguniagaqartumik sulissutiginiarlugu siulersuisut sulianik pikkorissuseqartumik ingerlatsisalernissaat, aamma Naalakkersuisut piginnittuunermik inissisimanerminnik namminneerlutik suliarinninnissaat. Najoqqutassiat taamatut ineriartornermut, Naalakkersuisullu siulersuisunut qullersaqarfinnullu isumalluarnerat pillugu, ammanerusumik ingerlatsinermik ikorfartuutaapput, Naalakkersuisut siulittaasuat, Kuupik V. Kleist, tusagassiuutinut nalunaarummi ilaatigut oqarpoq.
