Suliaq Atammimmut tunngasoq Amerlanerusut McGregorip atornerluisimaneranik oqaluttuartut
![Atammik, februaarip 9. 2017](/sites/default/files/styles/image_934x467/public/webform/oc7a4101.jpg?itok=4zQBvY9T)
Kommunip Namminersorlutillu Oqartussat angalaqatigiit aasap ingerlanerani nunaqarfimmukartippai. Nunaqarfimmi innuttaasorpassuit geologip, Victor McGregorip meeqqat inuusuttullu naapertuutinngitsuliorfigisimasai suli naalliuuteqartorpassuusut Namminersorlutik Oqartussat Nakkutilliisuisa nalunaarutaanni inerniutigineqareersoq tamanna pivoq.
Nunaqarfimmukarnerit arlallit pereerneratigut amerlanerusut naapertuutinngitsuliorfigineqarsimanerminnik oqaluttuarsinnaalersimapput. Kommunillu Maniitsup nunaqarfiani maanna qanoq amerlatigut Victori McGregorimit naapertuutinngitsuliorfigineqarsimasut paasilerpai.
- Kinguaassiutitigut atornerlunneqarsimasut ilimagisamit amerlanerusut paasineqarsimapput, ilimagineqarsimasumillu suliaq annertunerujussuulluni, kommuni tusagassiutinut ataasinngornermi allappoq.
AAMMA ATUARUK McGregor suli kingunerlutsitsisoq
Kommunip tamanna tunngavigalu nunaqarfimmi ingerlariaqqittoqarnissaanut iliuusissatut pilersaarusiorpoq. Taamaammat tarnip pissusianik ilisimasallit ukioq manna septembarimi novembarimilu Atammimmukassapput innuttaasunullu peqataarusuttunut pikkorissartitsissallutik. Tarnip pissusianut ilisimasallit marloriarlutik tikeraarnissaanni kisimiilluni oqaloqatiginnittoqarsinnaassaaq.
Geologip Victor McGregorip nukappiaqqat ukiukitsut nunaqarfimmi Atammimmi Maniitsup eqqaaniittumi nerrivimmi arsaararnermik sungiusartakkani kinguaassiutitigut kanngutsaatsuliorfigisarsimagai, 2000-imi maajip qaammataani saqqummiunneqarpoq. Angut tigusarineqarlunilu tigummigallagassanngortinneqarpoq. Maniitsulli isertitsivianiitilluni imminut toqunnissani toqqarsimavaa. Kingorna suliaq unitsinneqarpoq.
Tamannali innuttaasut qaangiinniangaatsiarnissaannut alloriarnerup aallaqqaatigiinnaraa, kommunimi Ilaqutariinnermut Isumaginninnermullu ataatsimiititaliami siulittaasup, Hans Frederik Olsenip oqaatigaa.
- Suliaq ilungersunarlunilu artornarpoq, ajornaatsunillu aaqqiissutissaqarani, Hans Frederik Olsen oqarpoq.
Suliniummi meeqqat angajoqqaallu ilaatigut ikiorneqassapput. Meeqqat atuarfiat ilanngutitinneqassaaq nunaqarfimmilu ikiuigasuartartussanik pilersitsisoqassalluni. Kommunip angalaqatigiit nunaqarfimmukartarnissaat aasaq mannatulli ingerlatiinnarniarpaa. Qeqqata Kommuniata Namminersorlutik Oqartussatut ilaqutariinnut katsorsaaviliornissamut ikiorsiissuteqaqquai.
Suliaq 2000-mi saqqummiunneqarmat naapertuutinngitsuliorfigineqarsimasut 18-ileereersimasut kinguaassiutitigulluunniit atornerlunneqarsimanerminnik nassuerutiginnikkusunngitsut ikiorserneqarnissaminnik neqeroorfigineqanngillat. Taakkunanngalu amerlasuut ullumikkut suli naalliuuteqarput. McGregorip ikiliinera suli puiorneqanngilaq.
AAMMA ATUARUK Ilaqutariinnermut ataatsimiititaliaq Atammimmeeqqammivoq