Amerlanerussuteqartut aningaasaqarnermut naalakkersuisoq tatigaat
![](/sites/default/files/styles/image_934x467/public/article_images/randi_evald_vestergaard_5.jpg?itok=OIUpKqeV)
Erngup puiaasamiittup imeruersaatillu eqeersaatitalinnik akullit akitsuutaat pillugu Inatsisartut inatsisaata allanngortinneqarnissaanik siunnersuutip matumani oqaluuserineqarput.
- Soorunami toqqissisimananngilaq innuttaasunut allanut inatsit atuutsinneqassasoq piumasareriarlugu, taava namminneq imminni taamaallaat inatsit avaqqulaaginnarlugu aalajangersaanerit taakku akuerineqarsinnaanngillat, Partii Naleqqami siulittaasoq Hans Enoksen taama oqarpoq.
Nioqqutissanik eqqussuinermi akiitsuutit Inatsisartut ukiakkut ataatsimiinneranni aggustip qaammataanit kingumoortumik atuuttussanngorlugit novembarip qaammataani akuersissutigineqarput.
Kukkusumik toqqammaveqarluni akuersineq
Kingumoortumik atuutilersumik akitsuutinik qaffaaneq illuatungiliuttunit inuussutissarsiutinillu ingerlataqartunit sakkortuumik isornartorsiorneqarpoq, Naalakkersuisullu kukkusumik toqqammaveqarluni akuersissuteqartoqarsimasoq kingorna nassuerutigaat.
Aamma atuaruk Akitsuutinut akiligassanngortitat Naalakkersuisunit atorunnaarsinneqarput
Tamanna tunngavigalugu Partii Naleraq Inuit Ataqatigiillu Aningaasaqarnermut naalakkersuisumut Randi Vestergaard Evaldsenimut, Demokraatineersumut, tatiginninnginnermik taasisitsinermik siunnersuuteqarput.
- Suliap ingerlanneqarsimanera inatsisit malillugit suliarineqarsimanngilaq. Taannaavorlu uagut politikkikkut isummerfigisassanngorlugu inissitarput, Inuit Ataqatigiinneersoq Aqqaluaq B. Egede taama oqarpoq.
Siunnersuut pinngitsoortinneqarpoq
Siunnersuulli Naalakkersuisooqatigiinnit pinngitsoortinneqarpoq. IA-mi ilaasortaasimasoq, Naaja Nathanielsen, Naalakkersuisooqatigiit ilagalugit tatiginnikkunnaarnissamik taasititsinermut isumaqataanani taasivoq, isumaqannginnami Inatsisartut uukapaatinneqarsimasut.
Aningaasaqarnermullu naalakkersuisoq kukkusumik paasissutissiisimagaluarluni pinngitsoortitsineq nuannaarutigaa.
- Soorunalimi uanga akisussaaffik annerpaartaa tigummivara, naalakkersuisutut inissisimanera pissutigalugu, kisianni aamma uani inatsisiliortut akisussaaqataapput aammalu akuerisimasaat uani ilaalluni, Aningaasaqarnermut naalakkersuisoq Randi Vestergaard Evaldsen KNR-imut taama oqarpoq.
Inatsisartuni ilaasortat ataatsimiinnermi najuuttut 19-usut, aqqaneq marluk naalakkersuisut siunnersuutaannut akuersillutik taasipput, taamaalillutik illuatungiliuttut Randi Vestergaard Evaldsenimut tatiginninnginnermik taasisitsinerat pinngitsoortinneqarpoq.