Amerikamiut Nuummi konsulateqalernissaat akuerineqarpoq

USA-p Nuummi sinniisoqarfeqalernissaa Danmarkimi nunanut allanut tunngasunut ministereqarfiata akuersaarpaa. Ministereqarfik Sermitsiaq.AG-mut taama ilisimatitsivoq.
Amerikamiut Kalaallit Nunaanni sinniisoqarfeqalernissaannut pilersaarut ukiormanna aggustimili ilisimaneqarlerpoq.
Allattoq Ritzau
decembarip 20-at 2019 07:06
Nutserisoq Ivik Kristiansen

Taamaalilluni USA-p sinniisoqarfeqalernissamut pilersaarutini nangeqqissinnaanngorpai.

- Kalaallit Nunaanni oqartussat isumaqatigiissuteqarfiginerisigut, nunanut allanut tunngasunut ministereqarfiup amerikamiut Nuummi sinniisoqarfeqalernissaat akuerigaa, Sermitsiaq. AG. ministereqarfimmut apeqquteqareersorlu taama nalunaaruteqartoqarpoq.

AAMMA ATUARUK Amerikamiut arfineq marlunik sulisulimmik Nuummi sinniisoqalissapput

Amerikamiut Kalaallit Nunaanni sinniisoqarfeqalernissaannut pilersaarut ukiormanna aggustimili ilisimaneqarlerpoq.

USA-mi nunanut allanut ministeri, Mike Pompeo, Danmarkimi nunanut allanut ministerimik novembarimi ataatsimeeqateqareersorlu, Jeppe Kofodip (S) naqissuserpaa amerikamiut Nuummi sinniisoqarfeqalissasut.

Sermitsiaq.AG naapertorlugu pisortatigoortumik akuersineq maanna inissinneqarpoq.

Apeqqutilli arlallit suli akineqanngillat.

- Sinniisoqarfissami aqutsisussatut kina kissaatigineqarnersoq pillugu USA-p uatsinnut nalunaaruteqarnissaa qanorlu sulisoqassanersoq massakkut utaqqimaarparput. Sinnissoqarfissami aqutsisussussaq Nunanut allanut tunngasunut ministereqarfiup kalaallit oqartussaasuannut tusarniaassutigereerpagu aatsaat akuersisoqassaaq, Nunanut allanut tunngasunut ministereqarfiup Sermitsiaq.AG-mut akissutaani taama allaqqasoqarpoq.

Sermitsiaq.AG naapertorlugu, Sinniisoqarfissami atorfilittanik marlunnik sulisunillu tallimanik sulisoqarnissaa, USA-p pilersaarutigaa.

AAMMA ATUARUK Nunanut allanut tunngasuni qaffasissumik atorfillip nunarput USA-lu imminnut qaninnerulersissavai

Sinniisoqarfissaq aappaagumut ammarneqassasoq oqaatigikumisaarneqareerpoq. USA-li siullerpaamik sinniisoqarfeqalissanngilaq.

Tassami USA nunatsinni 1940-mi sinniisoqarfimmik ammaavoq, Danmarki Tysklandimi nazistinit taamanikkut tiguarneqarmat, 1953-imili sinniisoqarfeqarunnaarluni.

Amerikamiut nunatsinnut soqutiginninnerat nunani tamalaani ukiup affaata ingerlanerani sammineqangaatsiarpoq.

Donald Turmpillu Danmarkimut tikeraarnissaani aggustimi kinguartimmagu ilaatigut tupaallaatigineqaqaaq.

Tamanna pivoq, USA-p nunarput pisiariumalermaguli, ministeriunerummi, Mette Frederiksenip (S) tamanna eqqartorumasimanngilaa, siunnersuullu kalaallit qallunaallu politikeriisa atigartilluinnarpaat.