Amerikamiunik nunatsinni tikeraartoqarneq pititsiniarnertut isigineqassanngitsoq Trump isumaqarpoq

Amerikaminngaanniit nunatsinnut aallartitaqarneq pititsiniarnermik siunertaqanngitsoq, amerikami præsidenti, Donald Trump oqarpoq.

- Inussiarnisaarneruna, oqqassaariniarnerunngilaq, præsidenti tusagassiortunut ataasinngormat taama oqarpoq.

USA-p præsidentiata tullersortaata nulia, Usha Vance USA-p nunarsuarmi isumannaallisaanermut siunnersortiuneq, Mike Waltz nukissiuutinullu ministeri, Chris Wright ilagalugit sapaatip-akunnera una nunatsinnut tikeraassaaq.

Nunatsinnut sisamanngornermi tikissapput.

USA-llu nunanut allanut ministeriata, Marco Rubiop aamma Kalaallit Nunaat tikissagaa Donald Trumpip naatsorsuutigaa. Amerikami nutaarsiassaqartitsiviit CNN aamma The Hill taama allapput.

Qaaqqusaasimasut

USA-p nunanut allanut ministeria sapaatip-akunnera una kingusinnerusukkulluunniit tikinnissaa Trumpimit oqaatigineqartoq erseqqissarneqanngilaq.

Donald Trumpili naapertorlugu sisamanngorpat tikittussat kalaallinit qaaqquneqarsimapput.

- Qaaqquneqarsimavugut, isumassatsialaasorisimavaat, arlaatigummi qimataaqqapput, taanna oqarpoq.

- Kalaallit Nunaat siunissatsinniippasittoq isumaqarpunga. Nunat assigiinngitsut akornanni sillimaniarneq pillugu pingaaruteqartorujussuuvoq, taama oqarpoq.

Kiali amerikamiut nunatsinnut qaaqqusimanerai ersarissumik ilisimaneqanngilaq.

Ataqqinninnginneq

"The White House" naapertorlugu oqaluttuarisaanermut tunngasut takornariarnissaanik angalanissaq pilersaarutaareerpoq, kalaallit oqaluttuarisaanerat ilinniarfiginiarlugu nunatsinnilu qimussersuarmik unammersuaartoqarnissaanut isiginnaariassallutik.

Amerikamiulli tikeraarnerminni nunatsinni Naalakkersuisunik naapitaqassanngillat.

Naalakkersuisut siulittaasorigallagaat, Múte B. Egede Facebookikkut ikkussamini taama allappoq.

Danmarkip nunanut allanut ministeriata, Lars Løkke Rasmussenip amerikamiut tikeraarnissaat ataasinngormat isornartorsiorpaa. Taassuma "nangaasaarisutut" "ataqqinnissuseqanngitsutullu" DR-imut oqaatigaa.

- Takornariat arlaannaajunngillat. Takussutissatut isigineqarsinnaavoq. USA-p Kalaallit Nunaannut nuannarineqalerniarnerannik pissusilersorneruvoq, tusagassiutinut taanna oqarpoq nangillunilu:

- Kalaallit Nunaannut Naalagaaffimmullu orniginanngilaq, taamaattumillu piffissatsialaanngilaq.

Trumpip Kalaallit Nunaat pissarsiarerusullugu amerlasooriarluni eqqaanikuuaa - siullerpaamillu præsidentiunermini siullermeerluni oqaatiginikuullugu.

Trumpillu nunatta "tiguarnissaanik" eqqarsaateqarnera pillugu sapaatip-akunnerata siuliani aperitippoq.

- Isumaqarpunga iluatsissasoq, Trumpip NATO-mi generalsekretæri, Mark Rutte ataatsimeeqatiginerani taama akissuteqarpoq.