Mittarfiliornerit Allanngortiterisoqarnerani suliffissaqartuarnissaa Demokraatit naatsorsuutigigaat
Nunatsinni nunani allaneersunut mittarfiit qulimiguulinnut mittarfinngortinneqassappata tamanna Kangerlussuarmi Narsarsuarmilu sulisunut sunniuteqassaaq
Kisianni nunaqarfinni innuttaasut najugarisaminni illoqarfinniluunniit allani suli suliffissaqassasut, Demokraatini siulittaasup oqaatigaa.
- Tamannali innuttaasut namminneq aalajangigassarivaat, isumaqarpugut politikkikkut aalajangersagassaanngitsoq innuttaasut sumi najugaqassanersut. Nunatsinni innuttaasup kialluunniit nammineq aalajangissavaa sumi najugaqassanerluni, Niels Thomsenip oqaatigaa.
AAMMA ATUARUK Narsarsuaq Kangerlussuarlu qulimiguulinnut mittarfinngortinneqarlik
Kangerlussuaq Narsarsuarlu qulimiguulinnut mittarfinngortinneqassapput, taarsiullugulu pilersaarutaareersut malillugit Nuummi Ilulissanilu mittarfissualiortoqassaaq Qaqortumilu nunap immikkoortuani mittarfiliortoqarluni. Demokraatit tamanna taperserlugu sapaatip akunnerani matumani nalunaarutigaat.
Deloittep nalunaarusiaa naapertorlugu allannguineq taamaattoq sulisunut sunniuteqassaaq, nunaqarfinnilu taakkunani innuttaasunit 600-t missaanniittunit amerlanerpaat nuuttariaqalissallutik.
Pissutsillu allanngussappata nunaqarfinni innuttaasut atorfitsik allanngortinnagu illoqarfinnut allanut nuunnissaannut sulisitsisup neqeroorfigissagai, siulittaasup naatsorsuutigaa.
AAMMA ATUARUK Kangerlussuaq Narsarsuarlu misissuinermi nutaami qumariartorput
- Tassani naatsorsuutigilluinnarparput sulisitsisut sulisullu akornanni isumaqatigiinniartoqarumaartoq ullumikkuminngaanniit pissutsit allanngorpata kikkut sumi sulissanersut, siulittaasoq oqarpoq.
Niels Thomsen oqarpoq erseqqissaatigalugulu Namminersorlutik Oqartussat ataanniittoq Nuttarsinnaanermut aningaasaateqarfik innuttaasunut tamanut periarfissaasoq.
Innuttaasunut Nunatsinni allami sulerusullutik nuukkusuttunnut tapiissutissatut 1 millioni koruunit Inatsisartut ukioq manna aningaasanut inatsisaanni immikkoortippaat.
AAMMA ATUARUK Qeqqata Kommuniata Kangerlussuaq tigorusuppaa