Allamik angallassisoqarneq akikinnerulersitsinngilaq

HiFlyimmi sulisui akissarsiakikkaluartut suliffeqarfiup suliassamik iminneqartarnera Air Greenlandimut akisuvoq.
Air Greenlandip timmisartorsua Norsaq iluarsarneqartussanngoraangat timmisartuutileqatigiiffiup nunatta Danmarkillu akornanni timmisartuussineq ingerlatseqatigiiffimmut allamut suliakkiissutigisariaqartarpaa.

Air Greenlandillu ingerlatseqatigiiffik Portugalimiittoq arlaleriarluni atorsimavaa, taassumalu sulisui 3.800 koruuniinnarnik qaammammusiaqartinneqartarput.

Tamannalu atuartartut arlallit qisuariarfigaat, Air Greenland HiFlyimik atuinermigut aningaasarpassuarnik sipaaruteqartarsimassasoq taamaattumillu akinik appaasariaqaraluartoq.

AAMMA ATUARUK Air Greenland suleqatigisartakkaminut nutaamik isumaqatigiissusiortoq

HiFlyilu akissarsiakitsitsigaluartoq ingerlatseqatigiiffiup atorneqarnera Air Greenlandimut akikitsuunngitsoq, Air Greenlandip pisortaanerata Jacob Nitter Sørensenip oqaatigaa.

- Air Greenlandimut aningaasartuutaangaatsiarpoq, nammineerlutami angallassigaangatta akikinnerujussuusarmat. Taamaammat HiFlyip atornera Air Greenlandimut sipaaruteqarfiunngilaq. Killuanilli Air Greenlandimut aningaasartuuteqarfiuneruvoq, pisortaaneq oqarpoq.

Air Greenland Norsaq ilursaanneqartillugu timmisartumik nammineq pigisaminik sillimmateqanngilaq, tassanngaannarlu pisoqartillugu akisuupilussuusarpoq.

AAMMA ATUARUK Air Greenland IA-mit aamma Siumumit isornartorsiorneqartoq

- Ingerlatseqatigiiffinnik taama ittunik atuisoqartillugu tassanngaannaq pisoqarsimasarpoq allamillu toqqagassaqarneq-ajorluni. Piffissakittuaraatinneqarlutik suliakkerneqartarput, tamannalu akinut sunniuteqartarpoq, uagullu nammineerluta ingerlatsinitsinnit akisunerujussuusarluni, pisortaaneq oqarpoq.

Jacob Nitter Sørensenip paasissutissiissutigaa piffissap ulapinnerpaaffiusup nalaani HiFlyip pingasoriarlugu atorneqarnissaa maannamut pilersaarutigineqarallartoq.

HiFlyimi sulisunut arlalinnut sulinermi atugassarititaasut pitsaasuunngitsut akissarsiakitsinneqartullu nittartakkami luftfart.nu-mi allaaserisani arlalinni sammineqarpoq. KNR-imillu sammineqalernerata kingorna Air Greenlandip Hiflyimut piumasaqaatigisimavaa Air Greenland sinnerlugu angallassigaangami sulisunut sulinermi atugassarititaasut pitsaasuunissaat qulakkiissagai.

Akissarsiaqarnerunissaat piumasaqaatinut taakkununnga ilaanngilaq.

AAMMA ATUARUK Air Greenlandimi paarlattaasut akissarsialutsitaasut