Air Greenland suleqatigisartakkaminut nutaamik isumaqatigiissusiortoq
Air Greenlandip timmisartuutileqatigiiffik suleqatigisartagaata HiFly-ip sulisuminut qaammammut 3800-nik akissarsiaqartitsinera, ullormiillu ullormut soraarsitseriaannaasarnera, utoqqalinersianik, napparsimanermi sulinngiffeqarnermilu akissarsiaqartitsisannginnera pillugu marsi naalersoq nutaarsiassaqartitsiviup luftfart.nu-p allaaserisaqattaarpaa. Taamannallu atugassaqartitsineq Air Greenlandimit tigulluarneqanngilaq.
AAMMA ATUARUK Air Greenlandimi paarlattaasut akissarsialutsitaasut
- Atorfinitsitseriaasitsinnut naapertuutinngilaq, tamannalumi HiFlyimut aamma paasissutissiissutigereerparput. Siunissamilu qaninnerusumi taamatut ingerlaannartoqassappat suleqatigisarnera ingerlaannassanngitsoq, Air Greenlandimi pisortaaneq Jacob Nitter Sørensen oqarpoq.
AAMMA ATUARUK Air Greenland IA-mit aamma Siumumit isornartorsiorneqartoq
HiFlyip sulisuminut atugassarititai qulaajaaffigineqareersulli suleqatigiinnermut kinguneqartussanngorpoq.
- Sulisunut atugassarititaasut inatsisit malillugit ingerlanneqarnersut HiFlyip suleqatiginissaa atsioqatiginnginnerani qulakkeerneqaqqaartalissaaq. Aningaasarsiat sulianut aamma naapertuunnissaat atorfigisami malinneqarnissaat, Jacob Nitter Sørensen oqarpoq.
Soraarnerussutisiassat, napparsimanersiassat allallu sulinngiffeqarnermi aningaasarsiassat isumaqatigiissusiornikkut qulakkeerneqaqqaarsimanersut Air Greenlandip eqqumaffiginerulerniarpai.
- Ataavartumik atorfinitsitsisoqarsimaneranik ilaatigut qulakkeerinneqqaartalissaagut.
Isumaqanngilarli HiFlyimi atorfillit Air Greenlandimi atorfilittut aningaasarsiaqalissasut.
- Aningaasarsiarititaasussatut oorisisarpata ajoriffissaqartinngilakka.
Air Greenlandimi sulisut Filippinerimut suliartortitaassagaluarunik taakkunaut aningaasarsiaqalerunnannginneri nassuiarpaa.
- Lissabonnimit Københavnimut timmisartuusseriarluni ulloq ataaseq marlulluunniit unnueriarlutik Lissabonimut uteqqittarput. HiFly tassani timmisartuussinermi atortarparput, taamaammat sulisut Lissabonimi najugaqarnissaat naatsorsuutigaarput, taamaalilluni Lissabonimi atugassarititaasut malillugit sulisussaassallutik, Jacob Nitter Sørensen oqarpoq.