Europa-Parlamentimut qinersineq: Allakkatigut ima qinersissaatit

Innuttaasut kalaallit Danmarkimi najugaqartut Europa-Parlamentimut Danmarkimi juunip ulluisa qulingiluaanni qinersisoqarnissaanut allakkatigut qinersisinnaalerput.

Allattoq Helle Nørrelund Sørensen

maajip 21-at 2024 15:57

Nutserisoq Connie Fontain

Nunarput ilisimaneqartutut EU-mut ilaasortaanngilaq. Kalaallilli Savalimmiormiullu Danmarkimi najugaqartut tamarmik danskisut innuttaassuseqarnertik pissutigalugu Europa-Parlamentimut aamma qinersisinnaapput.

KALAALLIT NUNAATA EU-LLU SULEQATIGIINNERAT

EU nunatta aningaasaqarneranut tapiisut annerit tulliattut inissisimavoq. Aningaasaqarnermut inatsit ukioq mannamoortoq naapertorlugu 250 millionit koruunit sinneqartut EU-miit tapiissutigineqarput.

EU-p Kalaallit Nunaatalu akornanni isumaqatigiissutit aningaasaqarnermut tunngasut arlaqarput, taakku aalisarnermut ilinniartitaanermullu tunngassuteqarnerupput.

Kalaallit Nunaat Issittumi nunani kisiartaalluni EU-mik suleqateqarnermik isumaqatigiissuteqarpoq.

Kalaallit Nunaat 1985-imi EU-mit, taamani EF-imik ateqartumit, ilaasortaajunnaarpoq.

Allisiguk

Qinersisoqarnissaanut ullut pingasuinnanngornissaata tungaanut tassa juunip ulluisa arfernata tungaanut Danmarkimi najukkanni innuttaasunut sullissivik aqqutigalugu allakkatigut qinersisinnaavutit. Kinaassutsimut uppersaammik atorsinnaasumik peqarnissaq piumasaqaataavoq.

Danmarkimi aalajangersimasumik najugaqaruit, Kalaallit Nunaanniikkallarlutillu, allakkatigullu Europa-Parlamentimut qinersiniarlutit, taava inunnik nalunaarsuisarfimmut saaffiginnissaatit.

Europa-Parlamentip Siunnersuisoqatigiit peqatigalugit inatsisit EU-mi nunani atuuttussat aalajangernissaat suliassarisarpaat.

EU nunatta karsianut sunniuteqangaatsiartartoq

Naak nunarput EU-mit – taamani EF-imik – taaguuteqartumit 1985-imi anereernikuugaluartoq EU nunatsinnut nunattalu aningaasaqarneranut ullumikkut pingaaruteqarluinnarpoq.

EU nunatta karsiata aningaasaqarneranut tapiissuteqartartut annerpaat tulliatut inissisimavoq. EU ukioq mannaannaq nunatta karsianut 250 millionit koruunit sinnerlugit tapiissuteqarpoq.

EU-mut suleqatigiinnissamut isumaqatigiissut pissutigalugu nunarput Europami ilisimatusarnissamut ilinniartitaanikkullu suleqatigiinnissamut periarfissaqarpoq, EU-lu nunatsinni ilinniartitaanermut 2021-mit 2027-mut 1,7 milliardit koruunit missaannik aamma aningaasaliilluni.

Tassungalu taarsiutitut ittumik EU-mi nunat nunatta imartaani aalisarnissamut pisassiissuteqarfigineqartarput.

Aamma atuaruk Immikkut ilisimasalik nassuiaavoq: EU Kalaallit Nunaannut ima pingaaruteqartigaaq

EU-p allaffia Nuummi marsimi ukioq manna ammarpoq, taanna Nunatta EU-milu nunat suleqatigiinnerannut pitsanngorsaaqataassaaq.

Europami nunani katillugit 27-ni innuttaasut juunip arfernanit qulingiluaanut Europa-Parlamentimut qinersissapput. Parlamentimut ilaasortanit 720-nit 15-it Danmarkimit qinigaassapput.

Europa-Parlamentimut ukiut tallimakkaarlugit qinersisoqartarpoq. Kingullermik 2019-imi qinersisoqarmat Danmarkimi qinersisinnaatitaasut 66 procentii qinersipput.

Tamanna kingullermik qinersisoqarneranit EU-mi tamarmi qinersinermut procentimit ataatsimoortumit 50,6 procentiusumit qaffasinneruvoq.