Aleqap ilinniarsimallutik sulisut meeqqat sumiginnakkat sammineqarnerannut ilannguteqquai

Meeqqat illersuisuiata Qaasuitsup kommuniani meeqqat atugaat isornartorsioreeraalu, Aleqa Hammond, Folketingip oqaluttarfianiit ullumi taama oqarpoq.

Inatsisit arlallit – ilaatigut meeqqat inatsisitigut nunatsinni illersorneqarnissannik imalik – siullermeerneqarneranni, Aleqa Hammondip kikkut nunatsinni meeqqat isumannaatsumik alliartornissaannut isumannaarinnittussaanersut taama oqaaseqarfigaa.

- Pineqartoq politikkimuinnaq samminngilaq.

- Una pingaaruteqangaarmat, politikkikkuinnaq aaqqiisoqarsinnaanngilaq. Aamma aningaasaannaat pineqanngillat, Aleqa Hammond oqarpoq.

Aamma atuaruk Meeqqat pillugit suiaqatinoortullu katissinnaanerat pillugu inatsisissat kiisami suliarineqalersut

Taanna isumaqarpoq Naalakkersuisut Inatsiartullu ikioqatigiillutik meeqqat inuusuttullu atugaannik pitsanngorsaaniarsarilereersut.

Ilinniarsimallutik sulisut politikeritulli pingaaruteqartigisut

Suliniutilli pitsanngorsaatillu aamma allaneertariaqartut Aleqa Hammond isumaqarpoq.

- Isumaqarpunga pingaaruteqartoq eqqaassallugu politikkikkuinnaq suliassaanngitsoq. Isumaqarpunga aaqqiissutissaq pitsaanerpaaq angussagaanni, inuiaqatigiinni sakkussaasinnaasut pitsaanerpaat tusarniaaffigissagivut, suut aaqqiissutaasinnaanerinik siunnersuutaat tusaallugit.

- Tamakku ilanngutissallugit aamma pingaarpoq, Hammond oqarpoq.

Aamma atuaruk Meeqqat Illersuisuata isornartorsiuinera akuerinngikkaat

Tamatuma saniatigut isumaginninnermut siunnersortit meeqqerisullu avataaneersut Kalaallit Nunaannut qinnuteqartaqqullugit kajumissaarivoq. Tamakku pisariaqartinneqartut Aleqa Hammond oqarpoq.

Ellemannip Kalaallit Nunaata oqartussaanera puioqqunngilaa

Kalaallit Nunaata nammineq kissaatigissappagu, Kalaallit Nunaanni isumagininnikkut ajornartorsiutinut pitsanngorsaaniarnermut ikiuussinnaallutik danskit partiivisa tamarmik oqaatigereeraat, danskit isumaginninnermut nunamullu namminermut ministeriat, Karen Ellemann, oqaluttarfimmit ima oqarpoq:

- Uani oqallinnermi isumaqarpunga pingaartorujussuusoq kalaallit namminneq isumaginninneq oqartussaaffigigaat puiorneqassanngitsoq, ikioqatigiissasugullu.

Aamma atuaruk Danskit politikerii kalaallit meerartaannik ikiuinissaminnik piareersimapput