Meeqqat Illersuisuata isornartorsiuinera akuerinngikkaat
Borgmesterip tulliata Jess Svanep qanittukkut oqaatigigaluarpaa Meeqqat Illersuisuata isornartorsiuinera Qaasuitsup Kommuniata akuerigaa. Isornartorsiuineq Meeqqat Illersuisuata Qaasuitsup Kommuniani illoqarfinnut nunaqarfinnullu angalanermini nalunaarusiaanik tunngaveqarpoq.
Kommunili maanna nalunaarpoq nalunaarusiaq tunngavissaqaranilu sulianut tunngassuteqarani nalunaarusiaasoq, paasissutissallu pineqartut atorneqarsinnaanngitsut.
- Kommunip nalunaarusiaq sakkortuumik illuatungilerpaa siunissarlu eqqarsaatigalugu sulinermi atorneqarsinnaanngitsutut nalilerlugu, Qaasuitsup Kommuniani pisortaaneq, Hans Eriksen, tusagassiorfinnut nalunaaruteqarluni ippassaq sisamanngornermi taama allappoq.
Ilaqutariinnermut isumaginninnermullu naalakkersuisup Martha Lund Olsenip Qaasuitsup Kommuniani sumiginnaasarnermik ajornartorsiutit aaqqiissuteqarfiginissaannut Nunarput Danmarkimit ikiorneqarnissaminik pisariaqartitsinersoq eqqartorniarlugu Folketingip Kalaallit Nunaannut tunngasunut ataatsimiititaliaanik ippassaq ataatsimeeqateqarnera nalerorlugu kommuni taama nalunaaruteqarpoq.
AAMMA ATUARUK Meeqqat Illersuisuat: Meeqqat pisinnaatitaaffii unioqqutinneqarput
Meeqqat Illersuisuat Aviaja Egede Lynge isumaqarpoq Qaasuitsup Kommuniata isornartorsiuinermik tusagaqarusunnginnera matumani pineqartoq.
- Kommunip isornartorsiorneqarnissani nuannarivallaanngilaa, matumanilu tamannarpiaq pineqarpoq. Isumaqarpungami kommunip isornartorsiortuaraanga. Uangali suliassaraara meeqqat atugaat nalinginnaasumik oqaaseqarfigissallugit, matumanilu taamaaliorpunga, tamannalu isumakulunnartoqartippara, Aviaja Egede Lynge nittartakkamut sermitsiaq.ag-mut taama oqarpoq.
