Aleqa ukiup uugarsuanngorpoq

Aleqa Hammondip inatsisartut ataatsimiinneranni oqaatsit inussiarniitsut peqqarniitsullu atortarsimammagit, Sermitsiami atuartartut ukiup uugarsuatut ilaatigut toqqarpaat.

- Illuatungiliuttut aquttuattut eqeersimaartutut isorinnittutullu atuuffissara eqquutsissimagakku ukiup uugarsuartut toqqarneqarnerma takutippaa, Aleqa Hammond aviisimi Sermitsiami apersorneqarluni oqarpoq. Aleqa Hammond isumaqarpoq angutaasimagaluaruni ukiup uugarsuatut toqqarneqarsimassanngikkaluarluni.

- Arnaq sakkortuunik tigussaasunillu oqalulluni sassartertoq inuit sungiusimanngilaat, isumaqartoqartarporlu arnat ataatsimut isigigaanni taamaaliortoqarsinnaanngitsoq, Aleqa Hammond oqarpoq.

Aleqa Hammondip ukiup uugarsuatut toqqarneqarneranut pisut aalajangersimasut marluk pissutaasut, aviisimi Sermitsiami allaaserineqarpoq.

Naalakkersuisut peqquserluttutut Aleqa Hammondip oktobarimi pasillerpai, naalakkersuisunullu ilaasortaq, Jens B. Frederiksen, inatsisartut ataatsimiittarfianiinngippallaarnerarlugu.

Aalisarnermut piniarnermullu naalakkersuisoq, Ane Hansen, aamma aningaasaqarnermut naalakkersuisoq, Palle Christiansen, Aleqa Hammondip uugarsuartut toqqarneqarnissaanut unammillingaatsiarput.