Aleqa: Sakkortuumik oqallinneq Kuupiup akuerisariaqarpaa
Siumup siulittaasua taama akissuteqarpoq Naalakkersuisut siulittaasuat ukiortaami oqalugiaanni pillugu apersorneqarnermi ima oqarmat:
- Tamanit naluneqanngilluinnarpoq, ukiuni kingullerni aalisarnerup aaqqissuussaanerata aammalu aqunneqarnerata allanngortikkiartornerani, Naalakkersuinikkut oqallinneq sakkortoorujussuusimasoq aammalu akersuuffiulluni siornatigut takuneqarsimanngitsumik, Naalakkersuisut siulittaasuat, Kuupik Kleist oqarpoq.
Aleqa Hammond isumaqarpoq nipi sakkortooq Kuupik Kleistip akuerisariaqaraa suliassamisullu tigullugu aalisartullu oqariartorfigalugit nipi taama ittoq iluarinngikkini.
- Isumaqarpunga kikkut torinngitsuuneranik oqariartorneq nunap siuttuanit oqaaqqissaariniarneq manna inuiaqatigiinni suleruluttunut aalisartunut inuussutissarsiortunut ukiup ingerlanerani arlaleriaqalutik akerliussutsimik takutitsisarsimasut aammalu atsiornernik tunniusseqattaarsimasunut ataqqinninnginnermik oqariartornerusoq, Siumup siulittaasua Aleqa Hammond ilaatigut allappoq.
- Tamat oqartussaaqataanerat inuiannaallu naalakkersueqataanerat isummersornerallu ataqqisassaapput torinngitsutut isiginiarnagit suleqatiseralugilli pisassaavoq, Aleqa Hammond allappoq.
Kattusseqatigiit partiiat
Kattusseqatigiit Partiiata Inatsisartuni ilaasortaatitaa, Knud Fleischer oqallinnermut aamma akuliuppoq.
- Aalisarneq pillugu annertuumik oqallinneq tamanit paasineqassappat pisariaqarluinnarpoq Aalisarnermut Naalakkersuisup, Ane Hansenip annerusumik neriorsuutini piviusunngortittariaqarpai, Kattusseqatigiit Partiiat sinnerlugu, Knud Fleischer Naalakkersuisut siulittaasuata ukiortaami oqalugiaataanut qisuariaamminni ilaatigut taama allappoq.
- Tassami oqallinneq annertooq ilaatigut paatsoornermik kinguneqartoq piviusumik paasineqarluni ingerlaqqissappat, Aalisarnermut Naalakkersuisoq piaartumik sumiiffiit ornillugit paasisitsiniaalluni angalasariaqarpoq, taamaalilluni paaseqatigiittumik ingerlaqatigiinneq anguneqassagaluarmat, Naalakkersuisut siulittaasuata ukiortaami oqalugiaataanut qisuariarluni Kattusseqatigiit Partiiat sinnerlugu, Knud Fleischer taama allappoq.
