Aleqa: Partiit allat demokratiskiunngillat
- Aalajangersimavugut januaarimili qinigassanngortitassatta aqqi saqqummiunniarlugit, taamaasillutik inuttaasut uagutsinnut qinigassanngortitassatsinnullu saaffiginnissinnaapput tamanna kissaatigissagunikku. Aamma taamaasiornikkut qulaakkeerniarparput sapinngisamik ammasumik periuseqarnissaq, Aleqa Hammond oqarpoq erseqqissarpaalu siusissukkut qinigassanngortittut aqqisa nalunaarutigineratigut qinersisartut ilisarinninnerunerisa saniatigut qineqqusaartut piareersarnissamut piffissaqarluarnerusut.
- Pingaaruteqarpoq qinigassanngortittut sammisanut iserluarnissaat, taamaasillutik qinersisartut piukkunnarluartunik toqqagassaqarniassammata. Tamakkulu Siumumi pigaavut, Aleqa Hammond oqarpoq.
Taamaattumik isumaqatigaa ilisimatooq qinersinermullu ilisimatusarsimasoq Jørgen Elklit Aarhusip Universitetianeersoq, taanna isumaqarmat sioqqutsilluarluni qinigassanngortitanik saqqummiussinnginneq demokratiskiunngitsuliornerusoq.
- Isumaqatigilluinnarpara taanna periuseq demokratiskiunngippallaarmat. Nunami demokrati tunngavigalugu aqunneqartumi innuttaasut isummernissamut piareersarluarnissaat pingaaruteqarpoq, Aleqa Hammond oqarpoq.
Siumukkormiummi periusaat qinersisoqalerpat iluaqutaassanerpoq?
- Qinersisartut sorleq krydsilerniarnerlugu namminneq aalajangerumaarpaat, Aleqa Hammond oqarpoq.