Aleqa: Niels Thomsen kiserliorpoq

Demokraatit ilungersunarluinnartumi inissipput politikkikkut oqaaseqartartoq gruppemit tapersersorneqanngimmat. Illuatungiliuttut ningiuat taama isumaqarpoq.
oktobarip 12-at 2011 11:49

- Isumaqarpunga Niels Thomsen maanna gruppemi kiserliortorujussuusoq, Siumup siulittaasua taama oqarpoq ilanngullugu oqaatigalugu IA-mik suleqateqarneq Demokraatinut ilungersunannguatsiartoq.

- Malussarfigisakka arlaqarput taakkulu malillugit Naalakkersuisooqatigiit imminnut ungasissorujussuarmik eqqarsariaaseqarlutik politikkikkut tulleriiaarinikkullu eqqarsarpoq tamannalu Demokraatit iluminni avissaarutigilerpaat, Aleqa Hammond oqarpoq.

Demokraatinut tamanna ilungersunarpoq Niels Thomsen politikkikkut oqaaseqartartuummat.

- Isumaqarpunga Demokraatit politikkikkut oqaaseqartartumik tapersersornissaa ajornakusoortikkaat. Tamanna ajornartorsiut Demokraatinut annertoorujussuuvoq. Tamanna Demokraatit oqallisigisariaqarpaat partiimmi suulluunniit attassinnaanngilaa politikkikkut oqaaseqartartup tapersersorneqannginnera, Aleqa Hammond oqarpoq.

Aamma eqqoriarsinnaanerarpaa sooq Niels Thomsen taaseqataannginnersoq Mimi Karlsenimik tatiginnikkunnaarluni sapaatip akunnera kingulleq taasisoqarmat.

- Nalunngilara Niels Thomsenip nalunngeqatigiissusaa ajunngilluinnartoq. Misigisimanngilaq inatsisinik unioqqutitsisoqarsimatillugu Naalakkersuisoq annaanneqarsinnaanngitsoq. Isumaqarpunga taasinngitsoq eqqortuusorisani malikkamiuk, Aleqa Hammdon oqarpoq ilanngullugu oqaatigaa Niels Thomsen Demokraatini nukittunerpaatut isigalugu.

Demokraatit akornanni isumaqatigiinnginneq suliallu allat pillugit Niels Thomsen oqaaseqarusunngilaq.