ATAATSIMUT ISIGALUGU Aleqa Hammondip nunatta karsianik atornerluisimanera
Inatsisartut Kukkunersiuinermut ataatsimiititaaliaat " Naalakkersuisut Siulittaasuata Namminersorlutik Oqartussanut akiligassarisimasai" pillugit allagaqarpoq. Aningaasat 106.363,27 kr.-it pineqarput, taakkulu ilaquttat timmisartumut billetsissaannut, ilaqutarisallu akunnittarfinniinnerannut, nerisaqarnerannut minibarimillu atuinermut tunngassuteqarput.
Aamma atuaruk Aleqap Nunatta karsia atornerlukkaa
- Naalakkersuisut siulittaasuata nunatta karsiata aningaasaatai atorlugit ilassinninnermut aningaasanik atornerluisimanini Naalakkersuisut siulittaasuata KNR-imut ilumuunnginnerarpaa.
- Paatsoortoqarsimavoq. Aningaasat pineqartut akilereerpakka, suullu pissusissamisut ilereerput , Radioaviisimut oqarpoq angalatitsivillu ilaquttaminut imminullu ataatsikkut akiligassiisimanera pissutigalugu pisuunerarlugu.
Aamma atuaruk Aleqap angalatitsivik pisuutikkaa
Aleqa Hammond ullumi arfininngornermi ullaap tungaani Atassutip ataatsimeersuarneranut peqataavoq, oqalugiaramilu Inatsisartut Kukkunersiuinermut ataatsimiititaliaata isornartorsiunera ilumuunnginnerarpaa.
Aamma atuaruk Naalakkersuisooqatigiinni eqqissisaaneq
Kukkunersiuinermut ataatsimiititaliap tallimanngormat unnukkut tusagassiorfinnut nalunaarutaani naalakkersuisut siulittaasorisimasaata KuupikV. Kleistip nunatta karsianut akiitsoqarnera aamma eqqaaneqarpoq. Taassumma 25.034 koruuninik akiitsoqarnini nassuerutigaa.
- "Kukkussutigisara allaffissornermik peqquteqanngilaq. Kukkuneq allamiinnani uanniippoq," Inatsisartut Kukkunersiuinermut ataatsimiititaliaanit isornartorsiorneqareerluni Kuupik V. Kleist KNR-imut taama oqarpoq..
Akiligassaqarnini nassuerutigaa taartaatali Namminersorlutik Oqartussat angalatitsiviat pisuutillugu.
Aamma atuaruk Ukiortaami angalanerminut atatillugu akiitsoqarnini Kuupiup nassuerutigaa
Inuit Ataqatigiit siulittaasuata Sara Olsvigip ersarissumik pissusilersornissaq Nunattalu tatiginartumik aqunneqarnissaa piumasaqaatigalugu qinersinissamut piffissanngorsoraa.
- Inuit Ataqatigiit erseqqissumik oqaatigissavaat taamatoqqinnaaq isummersussagamik, Naalakkersuisut maanna siulittaasuat siuliiluunniit pineqaraluarpataluunniit. Nunatta Karsia – kinaluunniit sunaluunnillu pineqaraluarpata – atorneqassanngilaq nammineq angalanernut, nammineq katerisimaartitsinernut, nammineq minibarinik atuinernut il.il. Tamanna akuerineqarsinnaanngilaq, Sara Olsvig isumaqarpoq.
Aamma atuaruk Inuit Ataqatigiit: Qinersisoqarli
Naalakkersuisut siulittaasuata, Aleqa Hammondip Nunatta karsia 106.000 koruuninik akitsoqarfigisaa, Namminersorlutik Oqartussat kukkunersiuisunit, Inatsisartut kunninersiuinermut ataatsimiititaliaanut paasissutissiinerisa kingorna, Inatsisartut kukkunersiuinermut ataatsimiititaliaa isumaqarpoq, inatsisinik unioqqutitsisoqarsimasoq, tamannalu kinguneqartinneqartariaqartoq, Inatsisartut kukkunersiuinermut ataatsimiititaliaata siulittaasuata, Siumumeersup Kristian Jeremiassenip oqaatigaa.
Aamma atuaruk Aleqa Hammondimut tatiginnikkunnaarnermik ersersitsisoqarnissaa Kristian Jeremiassenip siulittuutigaa
