Aleqa Hammondimik tatiginnikkunnaarnermik ersersitsisoqarnissaa Kristian Jeremiassenip siulittuutigaa
- Kingumut suleriaatsigut eqqarsaatigalugit, Aleqa Hammondip akiitsumini akileereersimagaluarpagilluunniit, tamanna inatsisinik unioqqutitsineruvoq, tamannalu attanneqarsinnaanngilaq, Kristian Jeremiassen KNR-imut oqarpoq.
Sooq tamassuma attaanneqarsinnaannginneranik Kristian Jeremiassen ima nassuiaavoq.
- Maanna naalakkesuisuutitaqartut illuatungiliuttuunerminni periuseraat, Naalakkersuisunut ilaasortaq kinaluunniit inatsisinik unioqqutitsigaagat tunuarnissaannik kaammattortarlugu, tamannalu Inatsiartut kukkunersiuinermut ataatsimiititaliaa maanna suliaasa assigerluinnarpaa, Kristian Jeremiassen oqarpoq imalu nangeqqilluni.
- Inatsisartut kukkunersiuinermut ataatsimiititaliaata tamakkiisut ersarilluinnartumik oqaatigaat, Aleqa Hammond inatsisinik unioqqutitsisimasoq, tamannalu attanneqarsinnaanngilaq kinguneqartinneqartariaqaraluarlunilu, Kristian Jeremiassen sukannersumik oqarpoq.
Taassuma taama oqarnermini eqqarsaatigaa, maanna illuatungiliuttuusut piumasgunik Naalakkersuisut siulittaasuannut tatiginnikkunnaarnermik ersersitsisariaqartut.
- Taama toqqaannartigisumik kaammattunngilakka. Kisianni kingumut qiviaraanni inatsisinik unioqqutitsisoqartarpoq tamannalu maanna illuatungiliuttuusunit ilisimaarineqarmat qularutissaanngilaq taakku tatiginnikkunnaarnermik saqqummiussissasut.
Inatsisartut kukkunersiuinermut ataatsimiititaliaata siulittaasua, Kristian Jeremiassen taama oqarpoq, eqqaamaqqullugulu Naalakkersuisut siulittaasorisimasaata, Kuupik V. Kleistip, Inuit Ataqatigiit, Nunatta karsia aamma akiitsoqarfigimmagu 25.000 koruuninik suli akilerneqarsimanngitsunik.
