Politikki

Aleqap angalatitsivik pisuutikkaa

Naalakkersuisut siulittaasuata Aleqa Hammondip aningaasanik Nunatta karsianeersunik atornerluisimannginnerarluni KNR-imut oqaatigaa. Uani aningaasat 106.363 koruunit nalinginik Nunatta karsianit timmisartumut billitsinut, akunnittarfimmi unnuinermut nuannataarnermullu ilaquttaminut aningaasartuuteqarsimanera pineqarpoq.

Allattoq Niels Krogh Søndergaard, Jonas Løvschall-Wedel, Mads Pedersen

septembarip 27-at 2014 01:11

Siumup siulersuisuuneri ataatsimeereersut Aleqa Hammond nassuiaateqarpoq.

- Paatsoortoqarsimasoruna. Isumannaagassat akilereerpakka, massakkut suut tamaasa pissusissamisut ipput, Naalakkersuisut siulittaasuat KNR-imut oqarpoq.

Aamma atuaruk Aleqap Nunatta karsia atornerlukkaa

Nammineq oqarpoq kukkussuteqarnani. Arlaleriarluni angalasarnermini, ilaquttani angalaqataanissaanik akunnittarfissaanillu inniminniisoqarnissaa kissaatigisimavaa, taakkulu immikkut akilerneqassasut.

- Atorfilittakka isumaqatigaakka angalaninni ilaquttakka angalaqataanissaannut inniminniissasut. Angalatitsivimmiillu akiligassaq takugakku takusinnaalerpara ataatsimut akilerneqarsimasut, Aleqa Hammond taama pisoqarsimanerarlugu oqaluttuarpoq.

Aningaasarpassuit pineqarput. Qanoq ilillutik Nunatta karsianut akiligassanngorsinnaagamik?

- Ilaqutariit amerlavugut. Uanili angalatitsiviup paatsoorsimanera pissutaavoq, Aleqa Hammond oqarpoq.
Naalakkersuisut siulittaasuata angalanernut, akunnittarfimmi unnuinermut minibarimiillu imeruersarnernut kiisalu Namminersorlutik Oqartussat iniutaanni ilaquttanilu nuannataarnermut 106.363 koruunit atorsimavai.

Qanoq innuttaasut Nunatta karsianit tigusisimannginnerarninnut qularunnaarsissinnaavigit?

- Sumilluunniit eqqunngitsuliunngilanga. Uani kukkulluni akiliisitsineq pineqarpoq, tamannalu ingerlaannaq paasivara. Taamaammat akiligassaq angalatitsivimmut utertippara, Aleqa Hammond pinngitsuunerarpoq.

Taassuma oqaatigaa suliap angalatitsiviup namminerlu akunnerminni suliarineqarnera sivisusimasoq. Nammineq oqarpoq pisoq aaqqereersoq 106.363 koruunillu akilereersimallugit. Akiliisimaneralu Inatsisartut Kukkunersiuinermut Ataatsimiitsitaliaanit uppernarsarneqarpoq. KNR-ip paasissutissat pissarsiai malillugit akiligassaq 5.000 koruunikkuutaarlugit naafferartumik akilersorneqarsimavoq.

Naalakkersuisut siulittaasuusimasoq Kuupik V. Kleist aamma Nunatta karsianit 25.034 koruuninik atuisimasoq Kukkunersiuinermut Ataatsimiititaliap allagaani paasinarsivoq.

Kukkunersiuinermut Ataatsimiititaliap kissaataa malillugu Naalakkersuisoqarfiit ukiuni qaangiuttuni aningaasanik atuineri misissorneqalerput, tamannalu Aleqa Hammondip nuannaarutigaa.

- Kukkunersiuinermut Ataatsimiititaliat sulilluarsimaqaat, taakkulu taperserpakka.