Naalakkersuisooqatigiinni eqqissisaaneq
Naalakkersuisooqatigiit siulittaasuata, Aleqa Hammondip, nunatta karsiata aningaasaataanik atorfimminut attuumassuteqanngitsunut atuisimanera ippassaq avammut saqqummiunneqareersoq, partiimut naalakkersuisooqataasumut Atassummut ullumi pulaarpoq.
Aleqa Hammond Atassutip Nuummi ataatsimeersuarnerani oqalugiarpoq, Siumumillu Atassummillu katersuutitsisutut imminut malugeqqulluni.
- Uagut (naalakkersuisooqatigiit) qinigaaqqinnissarput piinnarnagu inuiaqatigiinnik sullissivugut.
Oqaluttarfimmit ilaatigut taama oqarpoq, nunatta aningaasaqarnerata unittooqqaneranik aaqqissuusseqqinnissamillu suliniuteqartoqannginneranik piffissami kingullermi isornartorsiuisoqarnera innersuussutigalugu.
Naalakkersuisooqatigiinni ataqatigiinnissaq pingaartillugu oqaatigaa
Nunatta karsianit 106.363 koruuninik atorfimminut attuumassuteqanngitsunut atornerluisimannginnini Atassummi suleqatiminut oqaluttuarissallugu Hammondip pingaartikkaa malunnarpoq. Taamaammat oqaluttarfimmit siullertut oqaatigaa, Inatsisartut kukkunersiuinermut ataatsimiititaliaata isorinnilluni allagaqaataa, KNR-imit tallimanngornermi unnukkut issuaaffigineqartoq, ilumoortortaqanngitsoq.
Tamatuma kingorna Aleqa Hammondip politikkikkut oqaaserisai Atassutip suleqatiginerata pingaaruteqassusaanut tunngassuteqarput.
- Naalakkersuisooqatigiit pikkorissuseqartumik pitsaasumillu suleqatigiipput. Atassutip naalakkersuinikkut siunissaa neriuuteqarfigilluarlugulu annertuumik tapersersorpara, naalakkersuisut siulittaasuat Atassutip ataatsimeersuarnerani oqaluttarfimmit taama oqarpoq.
Atassummi qularineqartupilussuuvoq
Partiip naalakkersuisooqataasup ataatsimeersuarnerani peqataasut allatut isummerput. Aleqa Hammond oqaluttarfimmit aqqariitsiartorlugu, tusarfiit radioaviisip oqaloqatigisai arlallit naapertorlugit, Atassutip Siumullu naalakkersuisooqatigiinnerat oqallisigineqalerpoq.
Assersuutigalugu, ataatsimeersuarnermi oqaluuserisassat avataatigut immikkut oqaluuserisassat ilagaat: "Atassutip Siumumik suleqateqarnini ingerlatiinnassavaa?"
