Politikki

Aleqa Hammond eqqartuussivimmut suliassanngortinniaraa

Aleqa Hammond Siumut Folketingimi allattoqarfiata pisortarisimasaanit Kenneth Rasmussenimit eqqartuussivitsigut suliassanngortinneqaratarsinnaavoq.

Allattoq Helle Nørrelund Sørensen

aggustip 26-at 2016 06:57

Nutserisoq Mads Lynge

KNR-ip paasisai naapertorlugit Aleqa Hammondip aningaasat 21.839 koruunit akilerumanngilai, aningaasalli taakkua sulinermi peqatigiiffik Lederne naapertorlugu Kenneth Rasmussenip akissarsiatut, angalanermi ajunngitsorsiatut sulinngiffeqarnermilu aningaasarsiatut pissarsiassarai.

Aamma atuaruk Aleqa pisortarlu aaqqiagiinngitsut

Kenneth Rasmussen, Siumup Folketingimi allattoqarfiani pisortatut qaammatini qulingiluani sulereerluni ukioq manna maajimi soraarsitaavoq.

Paasissutissat KNR-ip pissarsiarisimasai naapertorlugit Aleqa Hammondip upernaaq qaaqqusaaffimminut, Arctic Winter Gameseqarnerani Nuummut angalanerani suliaq ilaatigut pineqarpoq.

Kenneth Rasmussenip soraarsitaanera Aleqa Hammondip KNR-imut upernaaq uppernarsarpaa, sulialli sulisunut tunngasuunera tunngavigalugu allamik oqaaseqarfigerusunnagu.