Aleqap talerperlernut tapersiinissaq piareersimaffigaa
Dronningi sinnerlugu naalakkersuisunngortitsinissamik periarfissarsiortitaasoq Lars Løkke Rasmussen ataatsimeeqatigereerlugu Siumup folketingimi ilaasortaatitaa Aleqa Hammond taama oqarpoq.
Venstret siulittaasuannik ataatsimeeqateqarnini Aleqa Hammondip kinguneqarluartutut tusagassiuutinut nalunaaruteqarluni oqaatigaa. Naalakkersuisunngortussat sulianik ingerlatsinissaminni Naalagaaffeqatigiinneq pingaartinniaraat taanna isumaqarpoq.
- Folketingimi sulinermut atatillugu ukiuni tulliuttuni suliniutit tamakkua saqqummiunneqarpata Nunatsinnut aamma Naalagaaffeqatigiinnut iluaqutaasussaappata soorunami tapersersussavavut. Aamma naak talerperlernut ilaanngikkaluarluta, Aleqa Hammond ataatsimeeqateqareerluni taama oqarpoq.
Aamma atuaruk Talerperliit ajugaanerat Kielsenip ajuusaarnartippaa
Ataatsimeeqatigiinnermi Aleqa Hammondip naalakkersuisunngortussanut partiimi kissaatai saqqummiuppai. Naalagaaffeqatigiinnerup ineriartortinneqarnissaanut atatillugu Naalagaaffiit namminersortut ataqatigiinnerannik taaneqartup naalakkersuisunit misissuiffigineqarluni aallartinneqarnissaa, Siumup kissaatigaa. Naalagaaffeqatigiinni taama inissisimasoqalernissaa Siumup siusinnerusukkut folketingimi ilaasortaatitaata Lars-Emil Johansenip anguniagassatut pingaartitarisimavaa.