Talerperliit ajugaanerat Kielsenip ajuusaarnartippaa
Talerperliit Danmarkimi qinersinermi ajugaasuupput, tamannalu Siumumi siulittaasumut Kim Kielsenimut eqqarsarnartoqartitsivoq.
Taassuma neriuutigisimagaluarpaa Helle Thorning Scmidt partiialu, teknikkikkut suleqatertik, Socialdemokraatit ajugaanissaat.
Suleqatiginerat ingerlaannassaaq
- Tassa soorunami qinersisartut aalajangiinerat aalajangiinerat ataqqivarput. Aamma oqaatigerusuppara, ajuusaarnarpoq ukua suleqatigut ajorsarmata taamaattorli qimarratiginavianngilagut, suleqatigissavagut aamma massakkut,
Kim Kielsen taama oqarpoq.
Tassa ippassaq sisamanngornerup unnuani paasinarsivoq, Danmarkimi partiit talerperliit amerlanerussuteqarlutik Naalakkersuisunngortitsinissamut isumaqatigiinniartussanngortut. Taakku 2011-mi naalakkersuisuunerat saamerlernut Helle Thorning Schmidtimit aqunneqartunut nuuppoq.
Talerperliillu Lars Løkke Rasmussen siuttoralugu naalakkersuisunngortitsinissamut isumaqatigiinniartussanngorput. Tamannalu Kim Kielsenip periarfissaqarnera takusinnaavaa:
- Soorunami siornatigut taakkua tungujortut, blå blokkit, Naalakkersuisuugallaramik aamma ajunngitsunik nunatsinnut iliuuseqartarput, eqaatsumillu tamakkua assigiinngitsut suliat ingerlanneqartarput.
Dansk Folkepartiikkut Kielsenip eqqarsarnartoqartikkai
Taamaakkaluartoq danmarkimi partiini qinerneqarnerpaat tulliat, talerperlernilu partii annerpaanngortut Kim Kielsenimut ernumanermik kinguneqarpoq.
- Taamaattorli uani eqqarsaatigineqartariaqarpoq, taakkunani talerperlerni Dansk Folkeparti annersaanngorpoq. Taakkualu soorunami eqqarsarnartoqartipparput tamanna, tassaagamik taakku politikkikkut oqariartuuteqartassasut sumut taakkua talerperliit ingerlassanersut, Siumumi siulittaasoq, Kim Kielsen taama oqarpoq.
