Aleqa Hammond silap pissusia pillugu ataatsimeersuarnissamut peqataajartulersoq

Aleqa Hammondip New Yorkiliarnissaata siunertaa tassaavoq, Naalagaaffiit Peqatigiit qullersaanit qaaqqunneqarluni nunat siuttuisa silap pissusia pillugu ataatsimeersuarnissaanni septembarip 23-ani pisussami oqalugiaateqarnissaa.
 
Silap pissusia pillugu nunat siuttuisa ataatsimeersuarnissaat Nalagaaffiit Peqatigiit Nunap Inoqqaavi pillugit Nunarsuarmioqatigiinnik Ataatsimeersuartitsinissaq septembarip 22-ani 23-anilu New Yorkimi aamma pisussaq nalerorlugu ingerlanneqartussaavoq.

AAMMA ATUARUK Aleqa Hammond New Yorkimi pingaarnertut oqalugiartunut ilaassasoq

Naalagaaffiit Peqatigiit 2010-mi ataatsimeersuarneranni nunap inoqqaavi pillugit Nunarsuarmioqatigiit 2014-imi ataatsimeersuarnissaat aalajangiunneqarpoq.
 
Nunarput, ilaatigut ICC aqqutigalugu, ataatsimeersuarnissap piareersarneqarneranut peqataasimavoq nunallu inoqqaavisa pisinnaatitaaffiisa, tassunga ilanngullugu Naalagaaffiit Peqatigiit Nunap Inoqqaaviisa Pisinnaatitaaffii pillugit Nalunaarutaanni anguniakkat sammineqarnissaat aamma sulissutigisimallugu.  

Nunarsuarmioqatigiit Ataatsimeersuarneranni Naalakkersuisut Siulittaasuat Aleqa Hammond ”nunap inoqqaavisa pisinnaatitaaffiisa nuna tamakkerlugu najukkanilu atuutsinneqalernissaat” pillugu septembarip 22-ani, Naalagaaffiit Peqatigiit qullersaata silap pissusia pillugu ataatsimeersuartitsinissaa ullormik ataatsimik sioqqullugu saqqummiussissaaq.

AAMMA ATUARUK Ban Ki-moonip nunarput nuimasumut inissikkusuppaa

Naalakkersuisullu Siulittaasuata Nunatta Washington D.C.-mi Sinniisoqarfia pisortatigoortumik ammaanersiorneqarnera pingasunngorneq septembarip 24-ani aamma peqataaffigissavaa.
 
Taamaalilluni oqartoqarsinnaavoq sapaatip-akunneri marlussuit qaangiuppata USA-liaruni pisussat pingasut ataatsikkoortillugit isumagissagai.