Ban Ki-moonip nunarput nuimasumut inissikkusuppaa
Nunatsinni silap pissusiata allannguutaanut misilittakkat nunarsuarmi silap pissusianut suliniuteqarnissamik pisariaqartitsisoqarnerata aallunneqarneranut tapertaanissaat qullersap naatsorsuutigaa.
Avatangiisinut Pinngortitamullu Naalakkersuisup Kim Kielsenip Naalagaaffiit Peqatigiit "Kikkut tamarmik nungusaataanngitsumik nukissiuuteqarnissat" pillugu taagorneqartumut suliniuteqarnerannut juunip sisamaaniit arfernanut ingerlanneqartumut atatillugu Ban Ki-moon-imik New Yorkimi ataatsimeeqateqarnermini ilaatigut tamanna oqariartuutigaa.
Ban Ki-moon erseqqissaavoq nunatta nunarsuup kissakkiartornerani misilittagai pingaaruteqarmata nunarsuarmioqataasut tusaaniartariaqartut ilinniarfigisariaqaraallu, Ban Ki-moon marsip qaammataani nunatsinniippoq.
Nunat tamalaat siuttui Naalagaaffiit Peqatigiit qullersaqarfianni septemberip 23-ani ataatsimeersuassapput, silap pissusaa tassani oqaluuserineqalerpat Naalakkersuisut siulittaasuat Aleqa Hammond oqalugiartussanut ilaassaaq.
Kim Kielsenip Ban Ki-moonimik ataatsimeeqateqarnermi saniatigut New Yorkimi "Kikkut tamarmik nungusaataanngitsumik nukissiuuteqarnissaat" pillugu oqalugiarnermi nunatta nukissiuutinut ataavartunut misilittagaasa kiisalu nukissiuuteqarnermi immikkut ittumik unammilligassaasa suunerisa aallunneqarnissai oqariartuutigai.
Aamma erseqqissaatigaa kikkut tamarmik mingutsitsinngitsunik nukissiuuteqarnissaat peqqissutsimi, ilinniartitaanermi, piitsuunermik akiuiniarnermi inuunermilu atugassarititaasunik pitsanngorsaanermi anguniakkat annertunerusut tapersernissaat pingaaruteqartut.
