Aleqa Hammond Pituffik pillugu oqaaseqarusunngilaq
Pituffimmi kiffartuussinissamik isumaqatigiissutip amerikamiunit tiguneqaratarsinnaanera naalakkersuisut siulittaasorisimasaata Aleqa Hammondip ilisimasaqarneranut ilimasulluni nunanut allanut tunngasunut naalakkersuisoq Vittus Qujaukitsoq ippassaq oqaaseqarpoq.
Vittus Qujaukitsup ilanngullugu oqaatigaa, naalakkersuisut siulittaasorisimasaat Pituffimmut suliamut akuliussimasoq naatsorsuutigalugu, Pituffimmullu suliaq pillugu naalakkersuisuni ilaasortanut allanut ilisimatitsineq ajorsimasoq.
Taamaattoqarsimaneratalu eqqartuussissuserisup qulaajaanerani uppernarsarneqarumaarnera Vittus Qujaukitsup ilimagaa.
Aamma atuaruk Pituffimmi kiffartuussinissamik isumaqatigiissuteqarneq Naalakkersuisut siulittaasorisimasaata ilisimasarfigisimavaa
KNR-ip Aleqa Hammond Vittus Qujaukitsup pasilliutaanut ullumi akitinniaraluarpaa, Aleqa Hammondili apersorneqarusunngilaq.
Aleqa Hammondip naalakkersuisut suliaannut oqaaseqarusunnani, namminerlu naalakkersuisut siulittaasuattut suliani oqaaseqarfigeqqusaanagit aamma oqaatigaa.
