Pituffimmi kiffartuussinissamik isumaqatigiissuteqarneq Naalakkersuisut siulittaasorisimasaata ilisimasarfigisimavaa
- Pituffimmi kiffartuussinissamik isumaqatigiissut Amerikamiut suliffeqarfiannit tiguneqarnissaa Naalakkersuisut siuliisa tamarmiusut ilisimanngilaat, - uani Naalakkersuisut siulittaasorisimasaat nunanut allanut naalakkersuisuusoq aamma, suliap ilisimasaqarfiginissaa naatsorsuutigaara, Vittus Qujaukitsoq oqarpoq.
Naalakkersuisut siullittaasorisimasaata aamma Nunanut allanut tunngasunut naalakkersuisuusimasup Aleqa Hammond-ip ilisimasat ingerlateqqissimanngilai, - tassanngaaniit naalakkersuisuusimasut sinnerinut ilimatitsisoqartarsimanngilaq taannalu eqqartuussissuserisunik qulaajaatsitsinermi uppernasianiakkatta ilagivaat, Nunanut allanut tunngasunut Naalakkersuisoq Vittus Qujaukitsoq oqarpoq.
Pituffimmi kiffartuussinissamut isumaqatigiissutip amerikamiunit tiguneqarneqarnera pillugu Naalakkersuisut eqqartuussissuserisunik qulaajaatsitsinerat naammassippat tamanna paasineqassasoq,
Vittus Qujaukitsoq oqarpoq, taassumalu neriuutigaa inatsisartut upernaakkut ataatsimiinnerat naamaassitinnagu qulaajaaneq naammassineqarumaartoq.
Inatsisartut ataatsimiineranni pingasunngornikkut apeqqarisaartoqarnerani Nunanut allanut tunngasunut Iinuussutissarsiornermillu naalakkersuisoq Vittus Qujakitsoq apeqqarissaarfigineqarpoq.
Inatsisartunut ilaasortaq aamma Inuit Ataqatigiit siulittaasuat Sara Olsvig Pittuffimmi kiffartuussinissamut isumaqatigiissut pillugu suliami arlalinnik apeqquteqarpoq apeqqarissaarnermi naammaginartunik aamma tamakkiisumik akissuteqarfigineqanngitsunik.
Inatsisartunut ilaasortaq Aqqaluaq B. Egede Inuit Ataqatigiit, paragraf 37 naapertorlugu Nunanut Allanut Tunngasunut Naalakkersuisumut Vittus Qujaukitsumut apeqqutinik 11-nik apeqquteqarpoq aamma pingasunngornermi inatsisartut ataatsimiinneranni Naalakkersuisunut apeqqarissaartoqarnerani Nunanut allanut naalakkersuisumut Vittus Qujaukitsumut arlalinnik apeqquteqarpoq, apeqqutigineqartulli tamakkiisumik akissuteqarfigineqanngillat, Naalakkersuisut eqqartuussissuserisumik qulaajaallutik misissuisitsinerisa naammassineqarnissaat utaqqineqarmat.