Aleqa Hammond marlunni siulittaasuunermigut attaveqatigiinnerulersitsiniarniarpoq
Folketingip nunarput pillugu ataatsimiititaliaani siulittaasooreerpoq, marlunnilli suliaqarnissaq ajornartorsiutitaqarnavianngitsoq, Naalakkersusut siulittasorisimasaat KNR-imut oqaluttuarpoq.
- Ilaana, ilaana. Arnaavunga misilittagaqqortooq, naalagaaffiup iluani pissutsinut tunngatillugu ilisimasaqartoq, aammalu suliassaqarfiit qaqitassat pillugit annertuumik sunniuteqarsinnaasoq. Taamaattumik suliat taakkua imminnut nukittoraqatigiipput ikorfartoqatigiillutillu, Aleqa Hammond oqarpoq.
Taanna Inatsisartunut qinersinermi partiimi nutaami Nunatta Qitornaani qinigassanngortikkami qinigaanngilaq. Partiiali naalakkersuisoqataalermat, siulittaasoq Vittus Qujaukitsoq Inatsisartunit sulinngiffeqarpoq, Aleqa Hammondilu inissaqalersillugu. Taanna sinniisussatut aallartikkami ullualuinnarni Inatsisartut ataatsimiititaliaasa pingaarnerpaat ilaanni, Nunanut Allanut Tunngasunut Sillimaniarnermullu Ataatsimiititaliaani siulittaasunngorpoq.
AAMMA ATUARUK Aleqa Hammond siulittaasuuffeqalerpoq
Piareersimalluarnerarporlu.
- Isumaqarpunga, nunarsuarmioqatigiinni sumi tamani issittoq pillugu politikkimi uagut qanoq isummersorfigineqarnerput malinnaaffigiinnarnagu aamma sunniuteqarfiginissaa pingaaruteqartoq. Naalakkersuisut nunanut allanut politikkiannut ataatsimiititaliakkut inatsisartuniit tunuliaqutsiillutalu nunatta nukittuumik inissisimanissaa qulakkeerinneqataaffigisinnaavarput.
Taanna sullivini marluk imminnut kilometerinik tuusintilikkaanik ungasikkaluartut, Folketingip nunarput pillugu ataatsimiititaliaani aamma Inatsisartut nunanut allanut tunngasunut sillimaniarnermullu ataatsimiititaliaani ataatsikkut siulittaasuunini nunatsinnut iluaqutaassasoq isumaqarpoq.
Tassami inatsisiliorfiit marluk akornanni oqaloqatigiinnerunissamik maqaasineq Folketingimit ilaasortanit Inatsisartunullu ilaasortanit tusakkajuppaa. Tamannalu pitsanngorsarusuppaa.
Ataatsimiititaliani susassareqatigiittuusugut illuatungeriilluta anguniarlugu, taamaalilluta politikkikkut suliniarnermi sunniutissaq annerpaaq angujumallugu, Aleqa Hammond oqarpoq.
AAMMA ATUARUK Aleqa Hammond ataatsimiititaliami pisortatigoortumik siulittaasunngortinneqalersoq
