Aleqa Hammond: Espersenip isornartorsiunera nunarput sinnerlugu eqqissilluni tiguaa
Taama oqarpoq Dansk Folkepartip Kalaallit Nunaannut tunngasunut oqaaseqartartua Søren Espersen, taassuma Naalakkersuisut isornartorsiorpai oqarluni unammilligassanik kivitsisinnaagunanngitsut aallaallumi qanoq ilungersunartigisumik inissisimasoqarnera nassuerutigisinnaagunanngikkaat.
Taama isornartorsiuteqarneq Naalakkersuisut siulittaasuata eqqissilluni tiguaa.
- Soorunami isummersornera tusaatissatut tigusinnaavara, kisianni eqqissiivillunga taanna isornartorsiunera nunarput sinnerlugu oqaatigisinnavara, Naalakkersuisut siulittaasuat Aleqa Hammond taama oqarpoq.
AAMMA ATUARUK Dansk Folkepartiip Nunatsinnut "ikiorsiiniarnera" Olsvigip iluarinngilaa
Dansk Folkeparti Folketingemi partiit talerperliunerusut tassalu Konservativit, Venstret aamma Liberal Allliance peqatigiillutik oqallisissiamik apeqquteqaateqarput danskit ministeriunerat qanoq iliuuseqarniarnersoq aperineqarluni. Tassunga atatillugu Namminersorluni oqartussaaneq pillugu inatsit Søren Espersenip ilisimaarilluartariaqaraa Naalakkersuisut siulittaasuat isumaqarpoq.
- Søren Espersenip ilisimaarissagaa innersuussutigerusuppara tassami Namminersorneq pillugu inatsimmi allassimasoqarpoq, Kalaallit Nunaata Qallunaatut Nunaata akornanni aningaasaqarneq pillugu qanoq akuliuttoqarsinnaanerani akuliuttoqarsinnaanngineranillu tunngassuteqartumik allassimasoqarmat taannalu ilisimaarisariaqarpaa,
Aleqa Hammond oqarpoq, Søren Espersenillu isornartorsiunera ilumuuissunngitsoq erseqqissaatigalugu.
AAMMA ATUARUK Nunatta maanna inissisimanera Dansk Folkepartiip ernumanartoqartikkaa
- Naalagaaffeqatigiinneq pillugu Folketingemi oqallinnermi taamanili maannakkumut aningaasaqarnerput ajorseriaateqanngilaq, Søren Espersenip oqarneratut, nunatsinni suliffissaaleqineq qaartuuleraluttuinnartutut qaffasitsigisoq Aleqa Hammond oqarpoq nangillunilu,
- suliffissaaleqisut amerlapput ajunngilaq, Naalakkersuiusut inatsisartullu periarfissavut tamaasa atorlugit suliffissaaleqinerup akiorniarneqarnerani sullinnerput Søren Espersenip takusariaqarpaa, Naalakkersuisut siulittaasuat oqarpoq, innersuussutigaalu kisitsisit kingullit takutikkaat Naalakkersuisut suliniutaat ilorraap tungaanut sunniuteqariartortoq, Naalakkersuisut siulittaasuat Aleqa Hammond oqarpoq.
