Aleqa Hammond Danmarkimi innuttaasunik ataatsimiititsilersoq
NUTARTIGAQ: Innuttaasunik ataatsimiititsinerit Odensemi Esbjergimilu ingerlanneqassapput, Danmarkimilu kalaallit innuttaasut toqqaannartumik oqaloqatiginissaannik aammalu Folketingimi politikkikkut sulineq pillugu paasissutissiinissamik siunertaqarput.
Folketingip Kalaallit Nunaannut tunngasunut ataatsimiititaliaani kalaallit Danmarkimiittut atugaat immikkut sammillugit Folketingimi tusarniaasoqarnissaanik isumaqatigiissuteqartoqarnerata kingorna innuttaasunik ataatsimiititsinerit ingerlanneqassapput.
Tamannalu SFI-p nalunaarusiaa "Kalaallit Danmarkimiittut" aammalu Inuttut pisinnaatitaaffiit pillugit ilisimatusarfiup" nalunaarusiaa "Kalaallit Danmarkimiittut naligiimmik pineqarnissaat" tunngavigalugit pissaaq.
- Danmarkimi nunaqqatitsinnik pitsaanerusumik akuutitsinissaq pisariaqartinneqartoq malunnarpoq. Ataatsimiititsinissat tusarniaanissamut tapertatut atornissaat siunertaavoq, Aleqa Hammond tusagassiorfinnut nalunaarummini taama allappoq.
Innuttaasunik ataatsimiitsinerit Odensemi kalaallit illuutaanni sisamanngornermi januaarip 14-iani nal. 16.00 aamma Esbjergimi Vindrosenimi tallimanngornermi januaarip 15-iani nal. 13.30 ingerlanneqassapput.
Folketingimut ilaasortap nunatsinneersup aappaa, Aaja Chemnitz Larsen, aamma ilaatigut Esbjergimi Odensemilu innuttaasunik siornatigut ataatsimiititsisimavoq maannalu ataatsimiititsinissanut peqataaniarani.
