Aleqa Hammond ataatsimiinnernut pingaarutilinnut peqataanngitsoq
Folketingip Kalaallit Nunaannut tunngasunut ataatsimiititaliaa pingasunngormat sisamanngormallu ataatsimiimmat pingaarutillit oqaluuserineqarput.
Pituffimmi kiffartuussinermik isumaqatigiissut Camp Centurylu oqaluuserineqarput. Ministeriunerlu, Lars Løkke Rasmussen sisamanngormat ukiumoortumik ataatsimeeqatigineqarpoq.
Nunatta namminiilivinnissaa, Pituffimmi kiffartuussinermik isumaqatigiissut, Camp Century Issittumilu aningaasaliinissamut aningaasaateqarfik pillugit ministeriuneq ataatsimeeqatigineqartoq, ataatsimiititaliami siulittaasup tulliata, Inuit Ataqatigiinneersup, Aaja Chemnitz Larsenip oqaatigaa.
- Oqarusuppunga Kalaallit Nunaannut tunngasunut ataatsimiititaliap ataatsimiinnera una pingaaruteqarnerpaanut ilaasoq, tassa ministeriunermik ammasumik toqqaannartumillu ataatsimeeqateqarneq.
- Taamaammat oqaluuserisanik pingaartut ilaannik, ataatsimiititaliami sammiuakkatsinnik, ministeriunerup toqqaannartumik oqaloqatiginissaanut periarfissap atorluarnissaa, ataatsimiititaliamut pingaaruteqarluinnartuusoq isumaqarpunga, Aaja Chemnitz Larsen KNR-imut oqarpoq.
AAMMA ATUARUK Danmarkip nunat inoqqaavisa pisinnaatitaaffii unioqqutippai
Ukiumoortumik ataatsimiinneq
Aamma ataatsimiititaliami ilaasortaq alla, SF-imeersoq, Karsten Hønge, sisamanngormat ataatsimiinnermut peqataavoq. Taassumalu ataatsimiinneq ministeriunerup nalinginnaasumik ilisimatitsineratut taavaa.
- Ataatsimiinneq pingaaruteqarpoq. Ministeriunerup kiinangerlugu naapinnissanut periarfissaalluarpoq. Pingaarutillit oqaluuseraagut, soorlu Pituffik Kalaallit Nunaatalu namminiilivikkusunnera, Karsten Hønge KNR-imut oqarpoq.
Silarlunnera peqataannginnermut pissutaasoq
Ataatsimiititaliamili siulittaasoq, attaviitsoq, Aleqa Hammond, ataatsimiinnermut peqataanngilaq. Silarlunnera pissutigalugu Danmarkiliarsinnaasimanani, Aleqa Hammond KNR-imut allappoq.
Siulittaasorli ataatsimiinnernut peqataarusukkuni piffissami allami aallarsinnaasimagaluarpoq.
Danmarkimut ataasinngormat marlunngormallu timmisartuussisoqartarsimasoq, Air Greenlandimit oqaatigineqarpoq. Silarlunnerali pissutigalugu kinguaattoortoqarsimavoq, taamaammat marlunngormat immikkut timmisartuussisoqarpoq.
AAMMA ATUARUK Aleqa Hammond Folketingimi najuutinngitsoq
KNR-ip Aleqa Hammond itisiliinissamut periarfissinniarlugu e-mailikkut, facebookikkut, sms-ikkut oqarasuaatikkullu attaveqarfigisarpaa. Allakkakkulli akissuteqarnissani kisiat kissaatigaa, tassanilu allappoq, silap qanoq innera allanngortissinnaanagu.
