Aleqa Hammond Folketingimi najuutinngitsoq

Ministeriuneq Lars Løkke Rasmussen Nunatsinnit Savalimmiuniillu Folketingimut ilaasortanit apeqqarissaarfigineqarmat, aamma Pituffik pillugu isumasioqatigiisitsisoqarmat, Siumup Folketingimut ilaasortaatitaa, Aleqa Hammond peqataanngilaq.
Assi © : Kopenhagen Fur
marsip 04-at 2016 18:45

Nunatsinnut tunngasut arlallit Folketingimi sapaatit akunnerata ingerlanerani sammineqarput.

Nunatta Savalimmiullu folketingimut ilaasortaatitaasa ministeriuneq marlunngormat apeqqarissaarfigaat.

Danskit folketingimut ilaasortaatitaat qaammammut marloriarlugu ministeriunermut apeqqarissaarsinnaasarput.

Nunatsinniilli Savalimmiuniillu Folketingimut ilaasortat ukiumut sisamariaannarlutik apeqqarissaaqataasinnaasarput.

Nunatsinniilli, Siumut sinnerlugu Folketingimut ilaasortaq, Aleqa Hammond tassani peqataanngilaq.

Savalimmiormiut Inuit Ataqatigiillu Folketingimiititaat apeqqarissaarnermi, siorna decembarimi nalunaarutigineqartumi, peqataapput.

Aleqa: Pituffik pillugu attuumavallaartoq

Aamma Folketingip Kalaallit Nunaannut tunngasunut ataatsimiititaliaata Pituffik pillugu nunanut allanut tunngasunut ministeri pingasunngormat isumasioqatigimmassuk, Aleqa Hammond peqataanngilaq.

Pituffimmut suliaq Aleqa Hammondip Naalakkersuisut siulittaasuunerani aallartippoq, suliamullu oqaaseqarusunnani siornatigut arlaleriarluni oqaatigereerlugu, attuumassuteqarpallaarnini pissutigitillugu.

Tamakkua Folketingimi oqaluuserineqarneranni Aleqa Hammond Nunatsinniippoq, ilaatigullu Folketingimilu suliani pillugit innuttaasunut sisamanngormat ataatsimiititsilluni.

Maniitsumi, Sisimiuni, Aasiaani, Ilulissani Uummannamilu innuuttaasunut ataatsimiititsinissani qangalili pilersaarutigisimallugit, Aleqa Hammond e-mailikkut allappoq.

Aamma suliassaminik taama tulleriiaarisimanini iluarisimaarlugit allappoq.

Immiutsilluni apersorneqarusunngilaq, Nuummili innuttaasunut ataatsimiititsinerani KNR-ip peqataannginera uparuarpaa.

Aamma atuaruk Aleqa Hammond Nuummi innuttaasunik ataatsimiitsitsilersoq