Aleqa Hammond Nuummi innuttaasunik ataatsimiitsitsilersoq
Folketingimi ilaasortap Aleqa Hammondip Nuummi innuttaasut sisamanngorpat marsip pingajuani ataatsimiitsitsinissamut qaaqquai. Aleqap ataatsimiititsinermi Folketingimi suliani pillugit ilaatigut ilisimatitsissaaq.
Nuummi ataatsimiititsinissaq Danmarkimi ataatsmiititsinerit iluatsilluartut nanginneraat.
- Nuummi innuttaasut naapinnissaat qilanaaraara. Folketingimut ilaasortatut qinigaagamali aatsaat Nunatsinni ataatsimiititsilerpunga. Folketingimi sulinermi susassaqarfiit Nunatsinnut attuumassuteqartut ingerlanneqartarput, taamaattumik uagutsinnut qinikkanut pingaaruteqarpoq Nunatsinni qinersisartut naapittarnissaat oqariartuutaasalu tusaasarnissaat.
- Ukiup affaata ingerlanerani Siumut Folketingimi assigiinngitsutigut pingaarutilinnik suliaqarnermigut oqariartuuteqartarpoq, tamakkualu ilaatigut ataatsimiititsinermi saqqummiutissavakka. Neriuutigaara ataatsimiititsineq ammasumik oqalliffiussasoq assigiinngitsutigullu aamma apeqqutinik apuussaqarfiulluni, Aleqa Hammond tusagassiorfinnut nalunaaruteqarluni taama allappoq.
Ataatsimiititsineq Katuap Inersuaaraani nal. 19.30 aallartissaaq, taamaatinnissaalu naatsorsuutigineqarluni nal. 21.30.
Aleqa Hammondip aamma Nunatsinni illoqarfinni allani ataatsimiititsinissani pilersaarutigaa. Ataatsimiitsitsinissat allat pillugit kingusinnerusukkut nalunaaruteqartoqarumaarpoq.
