Alcoap inatsisartut sulinerat sunnerpaa
![](/sites/default/files/styles/image_934x467/public/article_images/inatsisartut630_4.jpg?itok=861dIDKZ)
Inatsisartut matoqqasumi ippassaq ualikkut kingusissukkut ataatsimiinnerminni taama erseqqitsigisumik oqarfigineqarput. Radioavisi taama paasitinneqarpoq.
Piginneqatigiiffissuit nunani tamalaanersut Nunatsinni aatsitassarsiornissaanik imaluunniit suliffeqarfissualiornissaminnik piukkooruteqartut utaqqikatalersimagunarput.
Tamannalu Inatsisartut inatsisiliornerannut sunniuteqartoq, Radioaviisimiit paasivarput. Tamanna Inatsisartut ippassaq ataatsimiinneranni oqaluuserisassat allanngoriataarnerisigut paasinarsivoq.
- Alcoa utaqqeqqissinnaanngilaq, Naalakkersuisut siulittaasuat Kuupik V. Kleist taama ersaritsitigisumik Inatsisartoqatiminut oqartoq, Radioavisi tusarpoq.
Taama oqarnera pivoq, oqaluuserisassani kingullertut matoqqasumik oqallittoqarmat.
Taamali nukingisaarigineq Siumup isumaqatiginngilluinnarpaa, piffissamilu sivisuumi piumasani uteqqippaa. Soorlu siulittaasoq Aleqa Hammond ataatsimiinnerup kinguninngua Naalakkersuisunut allagaqarluni aperisoq:
- Naalakkersuisut oqarput Suliniutinut Angisoorsuarnut inatsisissaq maanna 6. -7. december akuersissutigineqartariaqartoq utaqqisoqarmat. Kikkut utaqqippat?
Aleqa Hammondillu Naalakkersuisut aamma aperai isumaqarnersut, Inatsisartut Suliassanut Angisoorsuarnut inatsisissaq pillugit qanoq sukkatigisumik sulissanersut selskabersuit kisimiillutik aalajangissaneraat?
Aleqa Hammond isumaqarpoq, piginneqatigiiffissuit nunani tamalaaneersut tuavisaarinerat tunngavigalugu Naalakkersuisooqatigit inatsisiliornermi sulisut, inatsisartut nukinnguttariaqalersillugit.
Kisianni tassa Inatsisartut matoqasumik ataatsimiinnerminni aalajangerpaat, ukiakkut ataatsimiinneq ullunik marlunnik sivitsortoq, Inuussutissarsiornermut ataatsimiititaliap suliat angisoorsuit pillugit inatsimmut aamma Aatsitassat pillugit inatsimmut allannguutissanik suliaqarnerini piffisaqarneroqqullugu.